Qonunchilik palatasida “psixologik xizmat” tushunchasi huquqiy-normativ hujjatlar bilan belgilab qo‘yilmagani muhokama qilindi

Oliy Majlis Qonunchilik palatasining Fan, taʼlim, madaniyat va sport masalalari qo‘mitasi tomonidan O‘zbekiston psixologlar uyushmasi bilan hamkorlikda 21-fevral kuni “O‘zbekistonda aholiga psixologik yordam ko‘rsatishning huquqiy asoslari” mavzusida davra suhbati o‘tkazildi. Bu haqda palata matbuot xizmati xabar berdi. 

Davra suhbatida sohani rivojlantirish borasida olib borilayotgan ishlar ko‘lamiga qaramasdan jamiyatda ijtimoiy-psixologik, jumladan, oilaviy muammolar, “ommaviy madaniyat”ning salbiy taʼsirlariga tobelik holatlari uchrab turganligi, shuningdek yetarlicha bilim-malakaga ega bo‘lmasdan turib, “psixolog” maqomini noqonuniy o‘zlashtirib olayotgan shaxslarning faoliyati ommalashib borayotganligi qizg‘in muhokama qilingan.

Mutaxassislar tomonidan ijtimoiy tarmoqlar orqali o‘zini psixolog sifatida tanishtirayotgan va bu turdagi xizmatlarni taqdim etayotgan shaxslar avvalambor, mazkur yo‘nalishda oliy taʼlimga ega bo‘lishi hamda psixologik yordam ko‘rsatish huquqini beruvchi tegishli hujjatga ega bo‘lishiga oid talabni qonunchilikda belgilash lozimligi qayd etilgan. Bundan tashqari, “psixologik xizmat” tushunchasi huquqiy-normativ hujjatlar bilan belgilab qo‘yilmagani va amaliyotchi psixologlar reyestri mavjud emasligi ular faoliyatini nazorat qilishda qiyinchiliklarni yuzaga keltirilayotgani taʼkidlangan. Shuningdek, ayrim oliy taʼlim muassasalarida tashkil etilgan qisqa muddatli “Psixologlarni tayyorlash” kurslari tijoratga aylanib ketayotgani tanqid ostiga olingan.

Tadbir ishtirokchilari psixolog-mutaxassislarni tayyorlash va litsenziyalash borasidagi xorijiy tajribani tahlil qilishgan. Xususan, Yevropa mamlakatlarida psixologik taʼlim davri 3 yildan 5 yilgacha bo‘lgan muddatni tashkil etishini qayd etilgan. Davra suhbatida, shuningdek, amaliyotchi-psixologlarning faoliyatini litsenziyalash masalasi ham muhokama etilgan.

Davra suhbatida aholiga malakali psixologik yordam ko‘rsatishga doir faoliyatni tartibga solishga qaratilgan qonunlarni ishlab chiqish yuzasidan tegishli taklif va tavsiyalar berilgan.