Toshkent viloyati Ekologiya boshqarmasi xodimlari tomonidan noqonuniy baliq ovlanishining oldini olish maqsadida navbatdagi tungi reyd tadbiri o‘tkazildi. Bu haqda Ekologiya vazirligi matbuot xizmati xabar berdi.
Maʼlum qilinishicha, Quyi Chirchiq tumani “Qo‘rg‘oncha” MFY hududidagi reyd davomida Chirchiq daryosining chap qirg‘og‘ida mahalliy fuqarolar Sh.A. va A.I. tomonidan noqonuniy usulda, yaʼni elektr qarmoq yordamida baliq ovlanayotgani aniqlangan.
Ushbu shaxslarga tegishli narsalar ko‘zdan kechirilganda 1 dona elektr qarmoq, 1 dona rezina qayiq, 1 dona akkumulyator va 86 bosh har xil turdagi baliq (shundan 80 bosh tovon balig‘i, 2 bosh zog‘ora balig‘i, 4 bosh oq balig‘i) hamda 1 dona ondatra (mushk kalamush) borligi maʼlum bo‘lgan.
Holat natijasida Hayvonot dunyosini muhofaza qilish va undan foydalanish to‘g‘risidagi qonunning 34-(baliq ovlash) va 35-moddalari (baliq ovlashni amalga oshirish shartlari) buzilgan. Tabiatga esa 28 million 628 ming so‘m zarar yetkazilgan.
Huquqbuzarlarga nisbatan MJtKning 90-moddasi 4-qismiga (ov qilish va baliq ovlash qoidalarini, shuningdek hayvonot dunyosidan foydalanishning boshqa turlarini amalga oshirish qoidalarini buzish) asosan maʼmuriy bayonnoma rasmiylashtirildi. Hujjatlar tegishli tartibda sudga yuborish uchun tayyorlanmoqda.
Izoh (0)