O‘zbekiston ekologiyani asrash bo‘yicha global hamkorlikni rivojlantirishga qo‘shgan hissasi uchun “Chempion” unvoni bilan taqdirlandi, deb xabar bermoqda Ekologiya vazirligi axborot xizmati.
Unga ko‘ra, Samarqand shahrida o‘tkazilgan Yovvoyi hayvonlarning ko‘chib yuruvchi turlarini saqlash to‘g‘risidagi konvensiya ishtirokchilari konferensiyasining 14-yig‘ilishi doirasida Ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov va CMS konvensiyasi ijrochi kotibi Emi Frenkel o‘rtasida uchrashuv bo‘lib o‘tdi. Uchrashuvda “2024–2026-yillarga mo‘ljallangan ekologik aloqalar bo‘yicha global hamkorlik”ni rivojlantirishga qo‘shgan hissasi uchun O‘zbekistonga “Chempion” unvonini berish to‘g‘risida bitim imzolandi.
“Tabiat chegara bilmaydi. Bu, ayniqsa, qurib qolgan Orol dengizi Markaziy Osiyo va undan tashqaridagi aholi va yovvoyi tabiatga halokatli taʼsir qilganidan keyin o‘z isbotini topgan. Atrof-muhitni muhofaza qilish bo‘yicha CMS Global Hamkorligiga o‘z hissasini qo‘shish orqali O‘zbekiston ko‘chib yuruvchi turlarni himoya qilish bo‘yicha global saʼy-harakatlarda ishtirok etmoqda. Bu hamkorlik tabiat xalqlarni birlashtira olishiga, tabiatni muhofaza qilish uchun xalqlar birlashishi kerakligiga ishonchimizni mustahkamlaydi”, — dedi Aziz Abduhakimov.
Qayd etilishicha, Ekologiya bilan bog‘liq kun tartibi hukumatlar va xalqaro hamjamiyat uchun ustuvor vazifadir. Kunming-Monreal Global Biologik xilma-xillik dasturining ko‘plab maqsad va vazifalarining asosiy komponenti sifatida bog‘lanish ko‘chib yuruvchi turlarning omon qolishi, shuningdek, tiklanish, biologik xilma-xillikni saqlash va iqlim o‘zgarishiga moslashish uchun muhim ahamiyatga ega. Ushbu majburiyat ekologiyani asrash bo‘yicha muvofiqlashtirilgan saʼy-harakatlar va aniq natijalarga erishish uchun xalqaro hamkorlikni rag‘batlantirish, Atrof-muhitni muhofaza qilish bo‘yicha yangi global hamkorlikni (GPEC) yaratishni qo‘llab-quvvatlaydi.
Uchrashuv davomida “CMS Family” siyosatini ishlab chiqish organlari doirasida mavjud chempionlarni eʼtirof etish uchun maxsus donor tadbirlari tashkil etilayotgani taʼkidlandi. Sertifikat va tegishli reklama Chempionlarga milliy va xalqaro miqyosda ko‘chib yuruvchi turlarni saqlashga bo‘lgan sadoqatini va qo‘llab-quvvatlashini targ‘ib qilish imkoniyatini beradi.
Maʼlumot uchun: “Ko‘chib yuruvchi turlarni muhofaza qilish bo‘yicha chempionlar” dasturida bir qancha tashabbuslar ilgari surilgan. Ularning har biri maʼlum bir turga, turlar guruhiga yoki muammoli masalaga qaratilgan kattaroq dasturga hissa qo‘shadigan tadbirlar to‘plamini o‘z ichiga oladi. Chempionlar bir yoki bir nechta maxsus CMS tashabbuslari uchun kamida uch yil moliyaviy majburiyat olishga tayyor hukumatlar, kompaniyalar, tashkilotlar va shaxslar uchun ochiqdir.
Izoh (0)