Favqulodda vaziyatlar vazirligi Toshkent viloyati Olmaliq shahrida joylashgan metall tayyorlash sexida sodir bo‘lgan vaziyat to‘g‘risida ma’lumot berdi.
Qayd etilishicha, bir necha kundan beri davom etayotgan sovuq ob-havo, tog‘li hududlarda ko‘p qor yog‘ishi va qattiq shamol tufayli Enter Engineering kompaniyasining metall tayyorlash sexidagi (AZMK-3) vaqtinchalik qurilmaning tom qismi qulashi natijasida texnogen vaziyat vujudga kelgan.
Sodir bo‘lgan baxtsiz hodisa oqibatida voqea joyida quruvchi kompaniyasining 32 nafar ishchisi (barchasi Hindiston fuqarolari) jabrlangan, ulardan 3 nafari voqea joyida vafot etgan, 29 nafari turli darajadagi tan jarohatlari olgani sababli shifoxonaga joylashtirilgan. Jabrlangan fuqarolarning 4 nafariga shifoxonada zarur tibbiy yordam ko‘rsatilib, javob berilgan.
“Ayni vaqtda sodir bo‘lgan hodisa sabablari va oqibatlarini joyida o‘rganish, zudlik bilan bartaraf etish, jabrlanganlarga yordam ko‘rsatish maqsadida masʼul tashkilotlar ishtirokida ishchi guruh tuzilgan”, — deyiladi xabarda.
Avvalroq Tashkent Index “stoyankasi”dagi 50 metrlik qatorning tom qismi mashinalar ustiga qulab tushgani to‘g‘risida xabar berilgandi.
Izoh (0)