Qashqadaryo viloyati Muborak tumani hududidan o‘tuvchi avtomobil yo‘lidagi ko‘prik qulab tushdi. Tuman hokimligi matbuot kotibi holat yuzasidan ma’lumot berdi.
Qayd etilishicha, Muborak tumani hududidan o‘tuvchi Muborak—Pomuq—Alang—Nishon” avtomobil yo‘lining 17-kilometrida 1982-yilda (zovur ustida) qurilgan, uzunligi 12 metr bo‘lgan ko‘prik og‘ir yuk tashuvchi avtotransport vositalarining muntazam harakatlanishi natijasida nosoz holatga kelib qolgan. Hozirda ko‘prikdan harakatlanish to‘liq cheklangan, axborot beruvchi yo‘l belgilari o‘rnatilgan va avtotransport harakati uchun vaqtinchalik aylanma yo‘l tashkil qilingan.
Biroq 16-fevral kuni og‘ir avtotransport vositasi aylanma yo‘ldan harakatlanmasdan, avariya holatida bo‘lgan mazkur ko‘prikdan harakatlanishi oqibatida ko‘prikning temir-beton plitalari sinishi va qulab tushishi sodir bo‘lgan. Hodisa natijasida salbiy holat kuzatilmagan.
Mazkur ko‘prik “Yo‘l xo‘jaligi sohasini yanada takomillashtirish chora-tadbirlari to‘g‘risida”gi prezident qaroriga muvofiq, qayta qurish belgilangan bo‘lib, 2024-yil ikkinchi choragida to‘liq qayta qurilib foydalanishga topshirilishi rejalashtirilmoqda.
Eslatib o‘tamiz, 2023-yil mart oyida Amudaryoda yangi qurilayotgan temiryo‘l ko‘prigining bir qismi qulab tushgandi. O‘shanda hodisa oqibatida hech kim jabr ko‘rmagan. Holatga oydinlik kiritish maqsadida Toshkent shahridan tegishli mutaxassislar va laboratoriya xodimlari chaqirilgan edi.
Izoh (0)