Toshkentda 2024-yil yanvar oyida ta’mirlanmagan xonadonlarning ijara narxlarida tushish kuzatildi. Bu haqda Makroiqtisodiy va hududiy tadqiqotlar instituti xabar berdi.
Qayd etilishicha, 2024-yil yanvar oyida 2023-yil dekabr oyiga nisbatan Toshkent shahrida o‘rtacha taʼmirlangan turkumdagi xonadonlar ijara narxida o‘rtacha 0,2 foizga tushish hamda to‘liq taʼmirlangan turkumdagi uy-joylar ijara narxida 0,5 foizga o‘sish kuzatilgan.
O‘rtacha taʼmirlangan sinfdagi 1 xonali xonadonlar uchun taklif etilgan ijara narxlari 2023-yilning dekabr oyiga nisbatan o‘rtacha 1,2 foizga pasayib, 395 dollarni, 2 xonali xonadonlar ijara narxlari esa 0,2 foizga arzonlab (442 dollar) tashkil etgan, lekin ushbu turkumdagi 3 xonali uylarning ijara narxi 0,1 foizga (516 dollar) hamda 4 xonali uylarning o‘rtacha ijara narxlari 0,4 foizga (597 dollar) oshgan.
Maʼlumot uchun, 2023-yil noyabr oyidan buyon 2024-yil yanvar oyigacha o‘rtacha taʼmirlangan 1 va 2 xonali uylar uchun o‘rtacha ijara narxlari mos ravishda 1,5 foiz (401 dollardan 395 dollarga) va 2,2 foizga (452 dollardan 442 dollarga) tushib kelmoqda.
Yanvar oyida to‘liq taʼmirlangan 1 xonali uylar uchun o‘rtacha ijara narxlari 0,16 dollarga qimmatlab 477 dollarni tashkil etgan bo‘lsa, bu ko‘rsatkich 2 xonali uylar uchun 0,2 dollarga (654 dollar), 3 xonali uylar uchun 1 foiz (791 dollar) hamda 4 xonali uylar uchun 0,6 foiz (915 dollar) ni tashkil etgan.
Avvalroq O‘zbekistonda ko‘chmas mulk savdosi 2023-yilda 5,7 foizga oshgani to‘g‘risida xabar berilgandi. Yil davomida 272,4 mingta uy-joy sotilgan — bu o‘tgan yilgi 257 mingta shartnomalarning umumiy ko‘rsatkichlaridan ko‘p.
Izoh (0)