Buxoro viloyati Qorako‘l tumanida tadbirkordan bajarilgan qurilish ishlari dalolatnomasini imzolash uchun 60 million so‘m talab qilgan xo‘jalik rahbari ushlandi.
Xabarga ko‘ra, holat Bosh prokuratura huzuridagi departamentning Qorako‘l tuman bo‘limi va DXX xodimlari hamkorligida tadbirkorlik subyektlarining huquqlarini himoya qilish yuzasidan o‘tkazilgan tezkor tadbirda aniqlangan. Qorako‘l davlat o‘rmon-ov xo‘jaligi rahbari A.J. ushbu xo‘jalikda “O.H.” MCHJ tomonidan bajarilgan 612 million so‘mlik qurilish ishlari bo‘yicha tuzilgan dalolatnomani imzolashi hamda 157 million so‘m qarzdorlikni MCHJga o‘tkazib berishi evaziga tadbirkor L.O.dan 60 million so‘m talab qilib, shundan 45 million so‘mni olgan vaqtida ashyoviy dalillar bilan ushlangan.
Mazkur holat yuzasidan Jinoyat kodeksining 210-moddasi (pora olish) bilan jinoyat ishi qo‘zg‘atilib, tergov harakatlari o‘tkazilmoqda.
Izoh (0)