Buxoro viloyati Peshku va G‘ijduvon tumanlarida barpo etilayotgan ikkita shamol elektr stansiyasi uchun 73 ta turbina o‘rnatib bo‘lindi, deb xabar bermoqda Energetika vazirligi matbuot xizmati.
Ma’lum qilinishicha, har bir turbina minorasining balandligi 100 metr, shamol parraklarining har biri esa 84 metrni tashkil qiladi. Jami 158 ta shamol turbinalari o‘rnatiladi. Har birining quvvati 500 MVtdan bo‘lgan ushbu ikki (jami 1000 MVt) shamol elektr stansiyasi Saudiya Arabistonining ACWA Power kompaniyasi tomonidan qurilmoqda.
Mazkur loyihalar doirasida Xitoyning Envision kompaniyasi tomonidan quvvati 6,5 MVtdan bo‘lgan shamol turbinalari o‘rnatilyapti. Hozirgi kunga qadar jami quvvati 474,5 MVtga teng bo‘lgan 73 ta shamol turbinasi o‘rnatib bo‘lindi.
Mazkur elektr stansiyalarining dastlabki 400 MVt quvvati 2024-yil yakuniga qadar ishga tushiriladi.
Stansiyalar to‘liq ishga tushirilgach, yiliga 3 milliard 600 million kVt/soat elektr energiyasi ishlab chiqariladi. Buning natijasida yiliga 1 milliard 100 million kubometr tabiiy gaz tejalishiga erishiladi hamda atmosferaga 1,5 million tonna zararli gazlar chiqishining oldi olinadi.
Shuningdek, ushbu loyihalar doirasida uzunligi 260 kilometr bo‘lgan 500 kV kuchlanishli elektr uzatish tarmoqlari va ikkita 500 kV kuchlanishli ochiq taqsimlash uskunalari quriladi.
“Mazkur elektr uzatish tarmoqlari energetika tizimining shimoli-g‘arbiy (Qoraqalpog‘iston Respublikasi va Xorazm viloyati) hamda janubi-g‘arbiy (Buxoro va Navoiy viloyatlari) qismlarining bog‘lanishini mustahkamlaydi”, — deyiladi xabarda.
Ma’lumot uchun, Navoiy viloyatining Tomdi tumanida ham 500 MVt quvvatli shamol elektr stansiyasi qurilmoqda va uning ishga tushirilgan dastlabki quvvatlari hozirgi kunda “yashil” energiya ishlab chiqarmoqda.
Izoh (0)