O‘zbekistondagi axborot tizimlariga oxirgi bir haftada 32 mingdan ortiq kibertahdidlar uyushtirildi. Bu haqda IIV Kiberxavfsizlik markazi xabar berdi.
Qayd etilishicha, UzCERT xizmati tomonidan 5-fevraldan 11-fevralgacha mamlakat hududidagi axborot tizimlari va resurslariga nisbatan 32 156 ta kibertahdid aniqlangan.
Ulardan eng ko‘pi hukumatga tegishli axborot tizimlariga nisbatan uyushtirilgan bo‘lib, jami ko‘rsatkichning 52,7 fozini tashkil etgan. Shuningdek, sohalar bo‘yicha AKT (19,3 foiz),moliya (14,2 foiz), energetika (4,3 foiz) hamda ishlab chiqarish (3,.9 foiz) sohalaridagi axborot tizimlariga ham kibertahdidlar sodir etilgan.
Hafta davomida uchragan zaifliklar top-5 taligiga quyidagilar kiradi:
- CVE-2022−31813 — 18,5 foiz;
- CVE-2022−22720 — 18,3 foiz;
- CVE-2021−39275 — 16,9 foiz;
- CVE-2021−44790 — 16,9 foiz;
- ssl poodle — 16,2 foiz.
Eslatib o‘tamiz, Oliy Majlis Senati sayti 2022-yil 2-noyabr kuni xakerlar hujumiga uchragan edi. Ushbu holat yuzasidan olib borilgan tergovga qadar tekshiruv vaqtida aniqlanishicha, 2022-yilning sentyabridan boshlab Norin tumani Ulug‘bek ko‘chasida yashovchi, voyaga yetmagan 16 yoshli M.B. boshqalar bilan oldindan o‘zaro jinoiy til biriktirib, bir guruh bo‘lib, internet ijtimoiy tarmog‘i orqali kiberhujum uyushtirishga oid materiallarni ko‘rish orqali, ushbu yo‘nalishda noqonuniy xatti-harakatlarni o‘zlashtirib olib, 2-noyabr kuni Oliy majlis Senatiga tegishli bo‘lgan “www.senat.uz” veb-saytiga hamda boshqa saytlarga noqonuniy kiberhujumlar amalga oshirgandi.
Izoh (0)