“Barselona” Xavining o‘rniga Xabi Alonsoni olib kelishni maqsad qilgan

“Barselona” “Real”ning sobiq futbolchisi, hozirda “Bayer” bosh murabbiyi bo‘lib ishlayotgan Xabi Alonsoni jamoaga olib kelmoqchi.

Mavsum yakunlangach, Xavi kataloniyaliklar bosh murabbiyligini tark etadi.

Diario Sport nashrining xabar berishicha, nemis jamoasi bosh murabbiyi Xavining o‘rnini egallashga asosiy nomzodlardan biri bo‘lib turibdi. “Barselona” direktorlar kengashining bir necha a’zosiga 42 yoshli mutaxassisning ish uslubi yoqmoqda.

Shuningdek, Xabining kelishi asosiy raqobatchi “Real”ga katta zarba bo‘lishi ham ko‘zda tutilgan. Chunki Alonso 5 mavsum davomida Madrid klubi sharafini himoya qilgan.

Ispaniyalik murabbiyga “Liverpul” ham jiddiy qiziqish bildirmoqda. “Barselona” hammadan avval Alonsoga taklif yuborishni maqsad qilgan.

Xabi Alonso boshchiligidagi “Bayer” asosiy raqobatchi “Bavariya”ni 5 ochkoga ortda qoldirgan holda Bundesligada 1-o‘rinda bormoqda.