Namangan va Qashqadaryo viloyatlarida isteʼmolga yaroqsiz yog‘ ishlab chiqarayotgan yashirin sexlar aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Namangan tuman bo‘limi tomonidan tezkor tadbir o‘tkazilgan. Tadbirda “Y.Ch.” MCHJ rahbari B.A. “O‘rta Rovuston” MFY hududida yashirin sex tashkil etib, isteʼmolga yaroqsiz yog‘ mahsulotlarini ishlab chiqarayotgani aniqlangan. Ushbu sexdan 6,2 tonna qo‘lbola yog‘, 4,3 tonna chigit, 34 tonna shrot, 6,2 ming dona yorliqlar va boshqa tovar-moddiy boyliklari ashyoviy dalil sifatida olingan.
Shu kabi, departamentning Kitob va Nishon tumani bo‘limlari tomonidan DXX va IIB xodimlari bilan hamkorlikda o‘tkazilgan tezkor tadbirlarda fuqarolar X.I., M.Q, M.I. va A.U. o‘z uylarining yordamchi xo‘jaligida yashirin sex tashkil qilib, isteʼmolga yaroqsiz yog‘ mahsulotlari ishlab chiqarayotgani aniqlanlangan. Ushbu xonadonlardan jami 196 litr qo‘lbola yog‘, 608 kilogramm chigit, 3 dona elektr dvigatel, juvoz uskunalari va boshqa ishlab chiqarishda foydalanilgan tovar moddiy boyliklari ashyoviy dalil sifatida olingan.
Mazkur holatlar yuzasidan Jinoyat kodeksining 186-moddasi (xavfsizlik talablariga javob bermaydigan tovarlarni o‘tkazish maqsadini ko‘zlab ishlab chiqarish, saqlash, tashish yoxud o‘tkazish, ishlar bajarish yoki xizmatlar ko‘rsatish) va 186-2-moddasi (chigitdan olinadigan mahsulotni qonunga xilof ravishda ishlab chiqarish yoki muomalaga kiritish) bilan jinoyat ishlari qo‘zg‘atilib, tergov harakatlari o‘tkazilmoqda.
- Surxondaryoda ham iyun oyida iste’molga yaroqsiz yog‘ mahsulotlari muomalaga kiritilishining oldi olingandi.
- Xorazmda bo‘lsa inson sog‘lig‘i uchun xavfli spirtli ichimliklarni tayyorlab kelgan shaxs faoliyatiga chek qo‘yilgani,
- Namanganda 550 million so‘mlik dori vositalari yo‘q qilingani to‘g‘risida xabar berilgandi.
Izoh (0)