Qashqadaryoda hech qanday hujjatsiz kuchli ta’sir qiluvchi dori vositalarini sotgan dorixona sotuvchisi aniqlandi

Toshkent shahri va Qashqadaryo viloyatida kuchli taʼsir qiluvchi dori vositalarini muomalaga kiritilishining oldi olindi. Bu haqda Bosh prokuratura huzuridagi departament xabar berdi.

Ma’lum qilinishicha, departament hamda DXXning Yashnobod tumani bo‘limlari tomonidan tezkor tadbir o‘tkazilgan. Tadbirda Qorasuv ko‘chasidagi xonadonda yashovchi M.B.ning uyida fuqaro O.A. (muqaddam sudlangan) jami 392 dona “Regapin” nomli kuchli taʼsir qiluvchi dori vositasini o‘tkazish maqsadida saqlab kelayotganligi aniqlanib, ashyoviy dalil sifatida olingan.

Shu kabi, departamentning Qashqadaryo viloyati boshqarmasi tomonidan o‘tkazilgan tezkor tadbirda “N.F.” MCHJga qarashli dorixona sotuvchisi X.A. xaridorga hech qanday hujjatsiz jami 100 dona “Zardeks” nomli kuchli taʼsir qiluvchi dori vositasini sotgan vaqtida ushlanib, ushbu dorixonadan yana 60 dona kuchli taʼsir qiluvchi dori vositasi ashyoviy dalil sifatida olingan.

Departamentning Uchtepa tuman bo‘limi tomonidan DXX va IIB xodimlari bilan hamkorlikda o‘tkazilgan tezkor tadbirda esa “Q.Ph.” MCHJga qarashli dorixona norasmiy sotuvchisi Sh.Z. fuqaro G.L.ga jami 50 dona “Reduksin” nomli kuchli taʼsir qiluvchi dori vositasini shifokor retseptisiz sotgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.

Bundan oldin Sirdaryoda psixotrop dorilar savdosi bilan shug‘ullangan shaxslar qo‘lga olingani, DXX tomonidan Tojikiston va Qirg‘izistondan olib kelingan giyohvand moddalar savdosi bilan shug‘ullanuvchi shaxslar ushlangani, Toshkent viloyatida o‘tkazilgan nazorat-reyd tadbirlarida sintetik giyohvand vositalarini tayyorlovchi laboratoriya tashkil qilgan shaxslar qo‘lga olingani to‘g‘risida xabar berilgandi.