Germaniya moliya vaziri va liberal erkin demokratik partiya (FDP) yetakchisi Kristian Lindner mamlakat qashshoqlashib borayotganini aytdi. Bu haqda Bloomberg xabar berdi.
Amaldorning so‘zlariga ko‘ra, Germaniya iqtisodiy o‘sishning yetishmasligi fonida raqobatbardoshligini yo‘qotdi.
“Biz endi raqobatbardosh emasmiz. Iqtisodiy o‘sish yo‘qligi sababli biz qashshoqlashmoqdamiz”, — dedi vazir Frankfurtdagi tadbirida so‘zlagan nutqida.
Lindnerning nutqidan bir necha soat oldin Iqtisodiy hamkorlik va taraqqiyot tashkiloti (OECD) 2024-yilda Germaniya iqtisodiy o‘sishi prognozini eʼlon qilib, uni 0,3 foizga qisqartirgan. Germaniyada sanoat ishlab chiqarishiga oid ma’lumotlar shuni ko‘rsatadiki, hozirda u 2008-yilgi global moliyaviy inqirozdan keyingi eng past darajada.
“Hukumat ushbu tahlildan hech qanday xulosa chiqarmayotganini tasavvur qilib bo‘lmaydi”, — dedi Lindner OECD prognozi haqida.
Vazir Germaniya “ijtimoiy bozor iqtisodiyoti”ga erishish uchun mehnat bozorining moslashuvchanligini oshirishi va byurokratiyani kamaytirishi kerakligini ta’kidladi. Germaniya kansleri Olaf Shols mamlakatdagi iqtisodiy muammolarni eksport bozorlarining zaiflashishi va energiya narxining oshishi bilan bog‘laydi.
“Asosiy sabab shundaki, eksport bozorlarimizning bir qismi, ayniqsa Xitoy zaiflashib bormoqda. Bu yo‘nalishi eksport bo‘lgan mamlakatimiz uchun o‘z ta’sirini ko‘rsatmoqda. Shu bilan birga, biz yuqori inflyatsiya va energiya narxining oshishi bilan kurashmoqdamiz”, — dedi u.
Izoh (0)