Mashhur “Sug‘ur kuni” filmining qahramonlari 31 yil ichida qanchalik o‘zgargan?​

Mashhur “Sug‘ur kuni” filmi 1993-yil fevral oyida ekranlarga chiqqan. Oradan 31 yil o‘tgan bo‘lsa-da, har yili 2-fevral kuni ko‘plab tomoshabinlar sevimli filmini intiqlik bilan kutadi.

Bill Myurrey

Fil mahalliy televideniyeda ob-havo haqida ma’lumot beradigan kelishgan boshlovchi. U o‘zining xarizmasi orqali yog‘ingarchilik, harorat pasayishi va ko‘tarilishi haqidagi zerikarli xabarlarni yoritib, ularni haqiqiy shouga aylantiradi. Tomoshabinlar uni yaxshi ko‘rishadi, dastur reytingi doim yuqori Ammo studiyada chiroqlar o‘chgan zahoti Fil hayotdan zerikkan odamga aylanadi.

Bill Myurrey obrazi bir oz charchagan, istehzoli va hatto bema’ni, lekin aslida mehribon va odobli obrazni gavdalantiradi. Ammo, ajablanarlisi, ushbu filmdan keyin uning karyerasida pasayish yuz beradi: keyingi besh yil davomida u deyarli hech qanday qiziqarli rol o‘ynamaydi.

Ammo u o‘zini boshqa ijodiy sohada—- yozuvchilikda kashf qildi. 1999-yilda u “Zolushka hikoyasi: Golfdagi hayotim” kitobini nashr etdi, unda u o‘zining tarjimayi holi haqida gapirib, golfga bo‘lgan ishtiyoqini tan oladi.

1990-yillar oxirida aktyorlik karyerasi nihoyat tiklanadi: u Ues Anderson (“Rashmor akademiyasi”, “Suv hayoti”) va Jim Jarmush (“Qahva va sigaretalar”, “Singan gullar”) bilan birga bosh rollarni ijro etgan mustaqil Amerika filmlarida dramatik rollarni o‘ynay boshlaydi.

Ikki yolg‘iz amerikalik — katta yoshli erkak va yosh qiz o‘rtasidagi munosabatlar haqidagi “Tarjima mashaqqati” melodramasini suratga olish uning uchun katta muvaffaqiyat edi. Bu rol Billga “Oltin globus” va “Oskar” nominatsiyasini olib keladi.

Hozirda Myurrey yangi “Arvoh ovchilari” filmida suratga tushmoqda.

Bill 1994-yilda 14 yil birga yashagan xotini bilan ajrashadi, ularning turmushidan 2 o‘g‘li bor. Keyinchalik Myurrey liboslar bo‘yicha dizayner Jennifer Batlerga uylanadi va yana to‘rt farzand ko‘radi. 2008-yilda bu nikoh ham ajrashish bilan yakunlanadi.

Aktyorning hozircha so‘nggi bo‘lgan romantikasi qo‘shiqchi Kelis bilan. Xonanda bilan tanishgan paytda aktyor allaqachon 71, Kelis esa 43 yoshda edi. Ammo 2023-yilning avgust oyida er-xotin ajralishadi.

Endi Makdauell

Aktrisaning karyerasi 1990-yillarning o‘rtalaridan boshlab pasayishni boshlaydi — kassada muvaffaqiyatsizlikka uchragan va hech qanday tanqidga dosh berolmagan filmlarda rol o‘ynadi. Biroq keyin vaziyat yaxshilanadi: 2001-yilda “Omadsiz ayollar klubi” filmidagi yosh yigitga oshiq bo‘lgan o‘rta yoshli ayol rolini ijro etgani uchun tanqidchilar e’tirofiga sazovor bo‘ladi. Ajablanarlisi shundaki, bu film keng tarqalmagan va deyarli e’tibordan chetda qolgan.

Keyingi yillarda Makdauell asosan mustaqil filmlarda rol o‘ynadi, ular ham kamdan-kam hollarda katta ekranlarga chiqdi, bundan tashqari u televizion filmlarda va teleseriallardagi epizodlarda ko‘rinish berdi.

Uning kino karyerasi bir qancha omadsizliklarga uchragan bo‘lsa-da, 2000-yillarda fransuz kosmetika kompaniyasi — L’Oreal’ning yuzi sifatida taniladi.

Hozirda ham Endi filmlarda rol o‘ynamoqda. Bu yil u asosiy rollardan birini o‘ynagan “Qonli o‘ng qo‘l” dramasi ekranlarga chiqadi. Mazkur filmda Orlando Blum aktrisaning partnyori bo‘lgan.

1990-yillarda “Sug‘ur kuni” film chiqqanidan keyin Makdauellning shaxsiy hayoti ham o‘zgaradi. 1999-yilgacha u Pol Kuolli bilan turmush qurgan, bir o‘g‘il va ikki qizni dunyoga keltirgan. 2001-yilda u yana turmushga chiqadi — biznesmen Rett Xartsog bilan bo‘lgan nikohi bir necha yil davom etadi.

Hozircha yulduz uchun asosiy narsa uning karyerasi. “Tanishuv energiya talab qiladi. Men esa juda bandman. Men hozir hayotim mazmuni do‘stlarim va ishim ekanligini his qilyapman”, — deydi u yaqinda bergan intervyusida.

Kris Elliott

Operator Larri

​ Film chiqqandan so‘ng, u bosh qahramon singari yozuvchi bo‘ladi. Uning sakkizta kitobi nashrdan chiqqan. 2007-yildan beri u Devid Lettermanning Late Show nomli shousida ishtirok etadi. 2009-yilda esa u “Onangiz bilan qanday tanishganman” serialida Lili Aldrinning otasi rolini o‘ynagan. 2015-yilda u “Schitt’s Creek” filmida qahramon Ronald Shitt rolini ijro etgan.

Aktyor 38 yildan beri aktrisa Paula Elliott bilan baxtli yashab kelmoqda.

Stiven Tobolovski

Sug‘urta agenti — Ned Ryerson, bosh qahramonning sinfdoshi va filmning so‘nggi sahnasida uning karyerasiga turtki bergan.

11 yil o‘tgach, Tobolovski va Myurrey “Garfild” multfilmining suratga olish jarayonida yana uchrashishadi. Unda Stiven it o‘rgatuvchi rolini o‘ynaydi, Bill esa malla mushukka ovoz beradi.

Tanqidchilar tomonidan e’tirof etilgan rollar orasida “Radiodagi qotillik” filmida musiqachi va “Esla” psixologik trillerida Semmi Jenkins rolini o‘ynaydi.

Stiven, shuningdek, teatrda rejissyor, aktyor va bastakor sifatida ishlaydi. Aktyor 2002-yilda nufuzli “Toni” mukofotiga nomzod bo‘lgan. Stiven Tobolovski 36 yildan beri birgalikda yashayotgan sevimli rafiqasi Ann Xirn bilan ikki o‘g‘lini tarbiyalamoqda.