FIFA Forward dasturini hayotga tatbiq etish bo‘yicha FIFAga aʼzo mamlakatlarning natijalari eʼtirof etildi.
Mazkur dastur ko‘magida O‘zbekistonda so‘nggi yillarda futbolning ommaviyligini yanada oshirish, istiqbolli va iqtidorli futbolchilarni tanlash hamda professional darajada tayyorlash, turli yosh toifasidagi milliy terma jamoalarni rivojlantirish dasturi jadal olib borilmoqda.
FIFA yoshlarimizning U-20 va U-23 Osiyo Kubogi, FIFA U-17, FIFA U-20 Jahon chempionatidagi muvaffaqiyatli ishtirokini qayd etib o‘tdi. Bu — o‘zbek futbolini rivojlantirishning ulkan strategiyasidan darak bermoqda. O‘z o‘rnida mamlakatda “Maktabda futbol” va FIFA Forward rivojlanish dasturi faol tatbiq etilgan, deyiladi tashkilot xabarida.
Qayd etilishicha, 2016-2023-yillar davomida FIFA Forward dasturining moliyaviy ko‘magi asosida bir nechta loyihalar amalga oshirildi. O‘zbekiston futbol assotsiatsiyasi tomonidan milliy terma jamoalar uchun baza tashkil etish loyihasini moliyalashtirish uchun FIFAga ariza topshirilgan. Toshkent viloyatida joylashgan Milliy terma jamoalar markazi loyihasi — mamlakat futbolining kelajakdagi muvaffaqiyatlari uchun kalit bo‘lib xizmat qiladi.
Loyiha doirasida xalqaro standartlarga javob beradigan mashg‘ulot maydonlarini (2 gibrid va 2 sunʼiy maydon) yaratish, erkaklar va ayollar terma jamoalarining yig‘inlarini o‘tkazish uchun Milliy markazini rekonstruksiya qilish, shu jumladan, xizmat ko‘rsatish sohasini yaxshilash, infratuzilmani optimallashtirish maqsad qilingan.
Milliy markazni xalqaro standartlar asosida tashkil etish jarayoni quyidagicha davom etmoqda:
- 1-bosqich – Drenaj, sug‘orish tizimi va to‘rtta maydon qurish
- 2-bosqich – Stadion binosi va tribunalarini rekonstruksiya qilish
- 3-bosqich – asosiy stadion uchun projektorlar o‘rnatish
- 4-bosqich – O‘zbekiston jamoalari uchun mehmonxona bunyod etish.
FIFAning Osiyo va Okeaniya bo‘yicha mintaqaviy direktori Sanjivan Balasingam bu borada o‘z fikrlarini bildirib o‘tdi:
“O‘zbekiston Markaziy Osiyoda futbolni rivojlantirish borasida yetakchilik qilmoqda, FIFA Forward tomonidan mamlakat infratuzilmasiga sarmoyalar kiritmoqda. Mamlakat ko‘plab futbol assotsiatsiyalari bilan tajriba va bilim almashish yuzasidan seminarlar tashkil etmoqda. Yirik turnirlar, xalqaro musobaqalarga mezbonlik qilishda namuna bo‘lmoqda. Bu saʼy-harakatlar albatta O‘zbekiston terma jamoalarining o‘yinlarida ham ijobiy aks etayotgani quvonarli”, — deya taʼkidladi Sanjivan Balasingam.
Izoh (0)