Toshkent atrofidagi hududlardan metro bekatlarigacha ekspress avtobuslar qatnovi yo‘lga qo‘yilishi kutilmoqda

Toshkentning chekka hududlarini metro bekatlari bilan bog‘lash uchun ekspress avtobus qatnovlarini yo‘lga qo‘yish rejalashtirilmoqda. Bu O‘zbekistonning 2024-yilgi davlat dasturi to‘g‘risidagi prezident qarori loyihasida ko‘zda tutilgan.

Jumladan, “Nazarbek” hududidan Chorsu va Paxtakor metro bekatigacha hamda “Uch qahramon” hududidan Yunusobod dehqon bozori va Shahriston metro bekatigacha alohida ekspress avtobus yo‘nalishlarini tashkil qilish nazarda tutilgan.

Shuningdek, avtobuslar harakati ustuvorligini va piyodalar xavfsizligini ta’minlash maqsadida 2024-yil davomida mahalliy budjet mablag‘lari hisobidan uzunligi 29 kilometr bo‘lgan 8 ta asosiy transport koridorlarida (83 ta chorraha va 41 ta piyodalar o‘tish joyi) rekonstruksiya ishlarini amalga oshirish rejalashtirilgan.

Xorijiy bank krediti hisobidan Toshkent metropoliteni uchun 11 ta yangi metro poyezdlari (44 ta metro vagonlarini) xarid qilinishi kutilmoqda.