Shimoliy Koreya yangi “ultra-katta” kallaklar va yangi turdagi zenit-raketa bilan jihozlangan qanotli raketalarni sinovdan o‘tkazganini ma’lum qildi.
2-fevral kuni Janubiy Koreya harbiylari Shimoldan qanotli raketalar uchirilgani haqida xabar bergandi. 3-fevral kuni Shimoliy Koreya davlat matbuoti bu “ultra-katta” kallaklarga ega raketalar bo‘lganini xabar qildi.
“2-fevral kuni Raketa fanlari bosh boshqarmasi Sariq dengizda qanotli raketaning o‘ta yirik jangovar kallagi kuchini sinovdan o‘tkazdi, shuningdek, yangi zenit-raketa sinovdan o‘tkazildi”, — deyiladi Koreya Markaziy telegraf agentligi xabarida.
Shimoliy Koreya qanotli raketalar uchun kattaroq kallaklar ishlab chiqilishini e’lon qilish orqali raketalar yadro quroli bilan qurollanishga mo‘ljallanganini ta’kidlayotgan bo‘lishi mumkin, deb yozadi ABC News.
Shimoliy Koreyaning rasmiy markaziy axborot agentligi sinovdan o‘tgan raketalar soni va ularning ishlashi tafsilotlariga aniqlik kiritmadi. Agentlikning ta’kidlashicha, sinovlar mamlakatning “harbiy rivojlanishni jadallashtirish bo‘yicha muntazam faoliyati”ning bir qismi bo‘lib, qo‘shnilarining xavfsizligiga ta’sir qilmagan.
Janubiy Koreya harbiylari KXDRdan bo‘layotgan “provokatsiya belgilari”ni kuzatish uchun Qo‘shma Shtatlar bilan yaqindan muvofiqlashganini xabar qildi. Yonhap agentligi bu parvoz yil boshidan beri Shimoliy Koreya harbiylari tomonidan qanotli raketalarning to‘rtinchi uchirilishi ekanini eslatdi.
Izoh (0)