O‘zbekiston hukumati sement zavodlari qurilishiga moratoriy eʼlon qilishni rejalashtirmoqda. Bu haqda ekologiya, atrof-muhitni muhofaza qilish va iqlim o‘zgarishi vaziri Aziz Abduhakimov Oliy Majlis Qonunchilik palatasidagi nutqida maʼlum qildi.
Uning so‘zlariga ko‘ra, ayrim sement zavodlari ekoturizmni rivojlantirish mumkin bo‘lgan tog‘li hududlarda qurilgan. Bu korxonalarning mavjudligi salomatlik va tabiatga zarar keltiradi.
“O‘zim shaxsan o‘sha joylarga borib ko‘rgandim. Jizzax viloyatining Zafarobod tumanidagi turizmni rivojlantirsa bo‘ladigan hududda sement zavodi bor, hamma daraxtlar 5−10 kilometr atrofga qadar changdan bo‘lgan ‘plyonka’ga o‘xshash narsa bilan qoplangan. O‘sha yerdagi hamma o‘simlik va hayvonot dunyosining rasvosi chiqqan va barbod bo‘lgan. Lekin borib biz o‘rganib chiqqanimizda maʼlum bo‘ldiki, hozir qonunchilikda belgilangan shunaqa oqibat uchun bor-yo‘g‘i 100−200 million so‘m jarima qo‘llanar ekan”, — deydi vazir.
Aziz Abduhakimovning aytishicha, jarimaning eng kam miqdorini 10 milliard so‘m qilish rejalashtirilmoqda, bu esa korxonalarni zamonaviy chang va gaz tozalash uskunalarini o‘rnatishga majbur qiladi.
Ekologiya vazirligi rahbari tadbirkorlik faoliyatiga erkinlik berish maqsadida bunday loyihalar joy tanlashda va loyiha-smeta hujjatlarini tasdiqlashda ekologik ekspertiza o‘tkazishdan ozod qilinganini taʼkidladi. 2023-yil 1-noyabrda ekologik ekspertiza tiklangan. Bu ekspertizasiz yangi zavodlar qurilishiga yo‘l qo‘yilmaydi.
“Ochig‘ini aytganda, hozirgi kunda zavodlarimizning quvvati karra-karra O‘zbekistonning, aytaylik, ehtiyojidan ko‘proq. Shuning uchun hurmatli bosh vazirimiz boshchiligida bu masala hukumatda ham ko‘rib chiqilgandi. Va hozir mana qaror qabul qilindiki, hech qanaqa yangi sement zavodlarini O‘zbekistonda qurishga… moratoriy eʼlon qilarmiz, yaʼni to‘xtatib qo‘yamiz”, — deya taʼkidladi u.
Uning aytishicha, qurilgan 47 ta zavoddan 23 tasining faoliyati to‘xtatilgan. Bundan tashqari, 25 ta sement ishlab chiqaruvchi korxonalar ishini o‘rganish natijasida ularning 90 foizi ekologik talablarni buzayotgani aniqlangan. Aziz Abduhakimov sement ishlab chiqaruvchi korxonalar ustidan ekologik nazorat Bosh prokuratura bilan birgalikda amalga oshirilishini aytdi.
Prezident Shavkat Mirziyoyev 29-yanvar kuni o‘tkazgan yig‘ilishda yil yakuniga qadar 112 ta yirik sanoat korxonasi va barcha sement ishlab chiqaruvchilarda zamonaviy chang-gaz tozalash uskunalarini o‘rnatish va eskilarini almashtirish, havoga chang tashlash darajasi yuqori bo‘lgan korxonalarda filtrlarni yangilash muhimligi ta’kidlangandi.
Izoh (0)