Mikroto‘lqinli pechdan foydalanish bilan bog‘liq xavflar haqida biz bilgan ma’lumotlarning aksariyati shunchaki farazdir. Nazariy jihatdan, ba’zi oziq-ovqat va plastmassalarning mikroto‘lqinli nurlanishga ta’siri kanserogenlar yuzaga kelishiga sabab bo‘ladi. Mikroto‘lqinlar saraton kasalligidan himoya qiluvchi ozuqa moddalarini ham yo‘q qilishi mumkin.
Mikroto‘lqinlar — past chastotali nurlanishning bir turi bo‘lib, ular ionlashtiruvchi bo‘lmagan to‘lqin sifatida tasniflanadi. U saratonga olib kelmaydi, oziq-ovqatlarni radioaktiv nurlantirmaydi yoki DNKni o‘zgartirmaydi.
Mikroto‘lqinli pech magnetron deb nomlanuvchi qurilma tomonidan quvvatlanadi. U elektr energiyasini mikroto‘lqinli energiyaga aylantiradi. Oziq-ovqat mikroto‘lqinli pechga qo‘yilganda, energiya oziq-ovqat tarkibidagi suv molekulalarining tebranishiga olib keladi. Bu tebranishlar oziq-ovqat tuzilishini o‘zgartirmasdan issiqlik chiqaradi. Rasmiy ma’lumotlarga ko‘ra, bunday energiya miqdori odamlarga zarar yetkazishi uchun sezilarli darajada past.
Biroq mikroto‘lqinli pechdan foydalanish saraton xavfini oshirishi yoki kamaytirishi mumkinligi haqida qarama-qarshi dalillar mavjud. Shunday qilib, mikroto‘lqinli pechlardan chiqadigan nurlanish saratonga olib kelmasa ham mikroto‘lqinli pechdan foydalanish ovqatga yoki taom bo‘lgan idishga ta’siri tufayli bilvosita xavf tug‘diradi. Mikroto‘lqinlar kichik bo‘lsa-da, yuqori quvvat sozlamalarida kanserogen moddalarni ishlab chiqarishi mumkin.
Bularga quyidagilar kiradi:
Akrilamidlar — shakar va kraxmallar yuqori haroratda qizdirilganda hosil bo‘ladigan kanserogenlardir.
Bisfenol A — plastiklarni qattiq va shaffof qilish uchun ishlatiladigan kanserogen modda. Nazariy jihatdan, u haddan tashqari qizib ketganda oziq-ovqatga oqib chiqishi mumkin.
Ftalatlar — potensial kanserogen birikmalar bo‘lib, yumshoq va moslashuvchan bo‘lishi uchun plastmassa tarkibiga qo‘shiladi. Ular haddan tashqari qizib ketganda oziq-ovqatga aralashishi mumkin.
Mikroto‘lqinli pechning zarari haqida gipotezalar bor, ammo hozirgi kunga qadar bunday zararning ishonchli dalillari yo‘q. Biroq xavfsizlik nuqtai nazaridan mikroto‘lqinli pechda ovqat pishirish yoki isitish uchun faqat “mikroto‘lqinli pech uchun xavfsiz” deb yozilgan idishlardan foydalanish kerak.
Har qanday isitish usuli mahsulotning ozuqaviy tarkibini o‘zgartirishi mumkin. Saratonga qarshi kurash haqida gap ketganda, bu qayta ishlash jarayonida hosil bo‘lgan antioksidantlar oziq-ovqat tarkibidagi moddalarga qanday ta’sir qilishiga bog‘liq. Ular hujayralardagi DNKga zarar yetkazadigan erkin radikallar deb ataladigan molekulalarni zararsizlantiradi, bu ularning mutatsiyaga uchrashiga va saraton rivojlanishiga olib kelishi mumkin.
Lenta.ru saytiga bergan intervyusida onkolog Snejanna Gening ham mikroto‘lqinli pechlar saraton kasalligini keltirib chiqarmasligini ta’kidlaydi. Uning fikricha, qizdirilgan ovqat tarkibida radioaktiv to‘lqinlar yoki xavfli radiatsiya yo‘q. Biroq mikroto‘lqinli pechda isitish uchun mo‘ljallanmagan plastmassa o‘zidan zaharli modda chiqarishi mumkin.
Izoh (0)