Yevropa va xalqaro moliya institutlari Markaziy Osiyo mintaqasida barqaror transport aloqasini qo‘llab-quvvatlash va investitsiya kiritishga 10 milliard yevro ajratadi. Bu haqda Yevrokomissiya matbuot xizmati xabar berdi.
29-yanvar kuni Bryusselda Yevropa Ittifoqi va Markaziy Osiyo o‘rtasidagi transport aloqalariga bag‘ishlangan Global Gateway investorlar forumi ochildi. Xususan, tomonlar sayohat vaqtini 15 kungacha qisqartirish maqsadida Transkaspiy transport yo‘lagini transformatsiya qilishga kelishdi.
Yevropa komissiyasining qayd etishicha, Ukrainada urush boshlanganidan keyin Yevropa va Markaziy Osiyo o‘rtasida Rossiya hududi orqali tranzit o‘tmaydigan muqobil yo‘llarni izlash zarurati yuzaga kelgan.
O‘zbekiston va Yevropa investitsiya banki o‘rtasida 500 million yevrolik anglashuv memorandumi imzolangan. Umuman, YIB Qozog‘iston, Qirg‘iziston va O‘zbekiston bilan 1,47 milliard yevrolik kelishuv imzolagan. Mazkur kreditlar Yevropa Komissiyasi tomonidan taqdim etilgan kafolatlar orqali amalga oshiriladi.
Bundan tashqari, Yevropa tiklanish va taraqqiyot banki Qozog‘iston bilan o‘zaro anglashuv memorandumini imzoladi va u Markaziy Osiyoda umumiy transport aloqasini rivojlantirishga tayyorgarlik ko‘rayotgan loyihalar uchun 1,5 milliard yevro ajratadi.
Eslatib o‘tamiz, O‘zbekistonda 2023-yilning birinchi yarim yilligida xalqaro moliya institutlari va xorijiy hukumat moliya tashkilotlari bilan 17 ta loyiha doirasida umumiy qiymati 2,3 milliard dollarlik qarz bitimlari imzolangandi. Dekabr boshida esa Jahon banki O‘zbekistonda raqamli inklyuzivlik loyihasi uchun 50 million dollar kredit ajratishi ma’lum bo‘lgan edi.
Izoh (0)