Farg‘onada kuchli ta’sir qiluvchi dorilarni noqonuniy ravishda sotishga uringan ayol ushlandi

Farg‘onada kuchli taʼsir qiluvchi noqonuniy dori vositasini pullamoqchi bo‘lgan ayol ushlandi. Bu haqda Farg‘ona viloyati IIB axborot xizmati xabar berdi.

Ma’lum qilinishicha, viloyat IIB hamda Qo‘qon shahar IIB tezkor xodimlari tomonidan tadbir o‘tkazilgan. Tadbir davomida “Artizanbo‘yi” MFYda yashovchi 46 yoshli M.Sh. yashash xonadonida 100 dona “Tropikamid” nomli kuchli taʼsir qiluvchi psixotrop dori vositasini 9 million 500 ming so‘m evaziga sotgan vaqtda ushlandi.

Shuningdek, yashash xonadonida 10 dona “Tropikamid” va 61 dona “Lirika” nomli kuchli taʼsir qiluvchi psixotrop dori vositasini saqlab yurgani aniqlanib, tegishli hujjatlar rasmiylashtirilgan.

Mazkur holat yuzasidan tergovga qadar tekshiruv harakatlari olib borilmoqda.

Bundan oldin Sirdaryoda psixotrop dorilar savdosi bilan shug‘ullangan shaxslar qo‘lga olingani, DXX Tojikiston va Qirg‘izistondan olib kelingan giyohvand moddalar savdosi bilan shug‘ullanuvchi shaxslar ushlagani, Toshkent viloyatida o‘tkazilgan nazorat-reyd tadbirlarida sintetik giyohvand vositalarini tayyorlovchi laboratoriya tashkil qilgan shaxslar qo‘lga olingani to‘g‘risida xabar berilgandi.