Burkina-Faso, Niger va Mali G‘arbiy Afrika davlatlari iqtisodiy hamjamiyatidan (EKOVAS) chiqishlarini e’lon qildi. Tegishli bayonot Niger milliy televideniyesida o‘qib eshittirildi, deb xabar beradi Reuters.
“49 yildan so‘ng Burkina-Faso, Mali va Nigerning jasur xalqi tashkilot o‘z asoschilarining g‘oyalari va panafrikanizm ruhidan uzoqlashganini afsus va katta umidsizlik bilan qayd etadi”, — deydi Niger xuntasi rasmiysi Amadu Abdramane.
Uning qo‘shimcha qilishicha, EKOVAS bu mamlakatlarga “terrorizm va xavfsizlikka qarshi ekzistensial kurashda” yordam bera olmadi.
EKOVAS 1975-yil 28-mayda tashkil etilgan. So‘nggi maʼlumotlarga ko‘ra, jamiyat tarkibiga Benin, Burkina-Faso, Gambiya, Gana, Gvineya, Gvineya-Bisau, Kot-d’Ivuar, Kabo-Verde, Liberiya, Mali, Niger, Nigeriya, Senegal, Syerra-Leone va Togo kiradi.
Burkina-Faso, Gvineya, Niger va Malining aʼzoligi bu mamlakatlardagi harbiy to‘ntarishlar tufayli to‘xtatildi.
Izoh (0)