AQSH Davlat departamenti Turkiyaga F-16 qiruvchi samolyotlari, modernizatsiya to‘plamlari va boshqa tizimlarni umumiy qiymati 23 milliard dollarga sotishni ma’qulladi, deb xabar bermoqda Pentagon xavfsizligi bo‘yicha hamkorlik agentligi.
Turkiya AQSHdan 40 ta yangi F-16 samolyoti, 79 ta mavjud qiruvchi samolyot, ehtiyot qismlar, navigatsiya tizimlari, yer terminallari va boshqa qo‘shimcha jihozlarni so‘ragan. Davlat departamenti, shuningdek, Gretsiyaga 40 ta F-35 qiruvchi samolyoti va tegishli jihozlarni 8,6 milliard dollarga sotishni ma’qulladi.
AQSH ma’muriyati allaqachon Kongressni bu qaror haqida xabardor qilgan. Qonun chiqaruvchi organning ixtiyorida potensial bitimni ko‘rib chiqish va uni ehtimoliy bloklash uchun 30 kun vaqt bor.
Avvalroq Reuters va Bloomberg agentligi AQSH prezidenti Jo Bayden Kongress aʼzolariga maktub yo‘llab, mamlakat Shvetsiyaning NATOga aʼzo bo‘lish taklifini qabul qilganidan so‘ng Turkiyaga F-16 qiruvchi samolyotlarini sotishni “kechiktirmasdan” maʼqullashga chaqirganini xabar qilgandi. Oq uy ham xuddi shunday so‘rov yuborgan.
Izoh (0)