“Tolibon” qo‘mondoni Pokistonni bir kunda dunyo xaritasidan o‘chirib tashlash bilan tahdid qildi

Pokiston armiyasi bosh shtab boshlig‘i general Asim Munir har bir pokistonlikning hayoti butun Afg‘onistondan “muhimroq” ekanini ta’kidlab, pokistonliklarning xavfsizligi haqida gap ketganda hech kimni ayab o‘tirmasligi haqida “Tolibon”ni ogohlantirgan edi. Bunga javoban “Tolibon” qo‘mondoni Abdul Hamid Xurosoniy agar toliblar yetakchisi Mulla Haybatulloh Oxundzoda ruxsat bersa, Pokistonni bir kunda dunyo xaritasidan o‘chirib tashlash bilan tahdid qildi.

“Pokistonning musulmon xalqi bilan kelishmovchilik yo‘q, chunki Pokiston xalqi ham Pokistonning zolim hukmronligi ostida. Pokistonliklar afg‘on xalqining jihodiga duch kelmasligi uchun Britaniya va Amerika ishg‘olidan saboq olishlari kerak, agar ‘Tolibon’ yetakchisi ruxsat berib, jihodga buyruq bersa, ‘Tolibon’ mujohidlari bir kun ichida Pokistonni butunlay bosib oladi”, — dedi qo‘mondon.

U Afg‘oniston xalqiga qo‘pollik qilib, mamlakat ichki ishlariga aralashganlar javobsiz qolmasligini, qo‘shni davlatlar ham “Tolibon” hukumati ishiga aralashsa, keskin javob olishini ta’kidladi.

“Afg‘oniston ishlariga aralashishni o‘ylayotgan Pokiston hukumati va qo‘shni davlatlar, ‘Tolibon’ hukumatining sabrini sinamang. Afg‘oniston xalqi ‘Tolibon’ kuchlarini to‘liq qo‘llab-quvvatlaydi va bunday mamlakatlarga oqilona javob beradi”, — deb xulosa qildi “Tolibon” qo‘mondoni.