Qirg‘iziston TIV O‘zbekiston fuqarolarining viza olish tartibini tushuntirdi

Qirg‘iziston Tashqi ishlar vazirligi O‘zbekiston fuqarolarining viza olish tartibini tushuntirdi. Bu haqda vazirlikka tayanib, 24.kg xabar berdi.

Tashqi ishlar vazirligi Qirg‘iziston hududida bo‘lishning yangi qoidalariga ko‘ra, xorijiy davlatlar, jumladan, O‘zbekiston Respublikasi fuqarolari uzoq muddat qolish uchun tegishli toifadagi viza olishlari shartligini eslatib o‘tdi. Qirg‘iziston va O‘zbekiston hukumatlari o‘rtasidagi fuqarolarning o‘zaro sayohatlari to‘g‘risidagi kelishuvga muvofiq, vizalar uchun quyidagi tariflar qo‘llaniladi:

• olti oygacha – 10 dollar;
• bir yilgacha – 20 dollar.

O‘zbekiston fuqarolari Qirg‘iziston vizasini olish uchun “Elektron viza” portali orqali respublikadan chiqib ketish talabisiz murojaat qilishlari mumkin.

Viza olish uchun https://www.evisa.e-gov.kg/ saytiga kirib, hujjatlarni topshirish kerak.

“Tuugandar viza”sini olish uchun (Qirg‘iziston Respublikasi fuqarolarining oila aʼzolari uchun):

• O‘zbekiston fuqarosining pasporti;
• Qirg‘iziston fuqarosining shaxsiy guvohnomasi;
• munosabatlarni tasdiqlovchi hujjat (nikoh yoki tug'ilganlik to'g'risidagi guvohnoma);
• Qirg‘iziston fuqarosining arizasi;
• ish joyidan ish haqi to‘g‘risidagi ma’lumotnoma yoki Qirg‘iziston fuqarosining moliyaviy imkoniyatlari to‘g‘risidagi boshqa hujjat talab etiladi.

“Moliyaviy to‘lov qobiliyatini tasdiqlovchi hujjat sifatida chet el fuqarosining Qirg‘iziston hududida bo‘lishini moddiy taʼminlashni kafolatlash bo‘yicha notarial tasdiqlangan hujjatni taqdim etish mumkin. Qirg‘iziston fuqarolarining oila a’zolari uchun viza olishda boshqa qo‘shimcha talablar, jumladan, bank hisobvarag‘ida 50 ming som yoki boshqa summaning majburiy bo‘lishi sharti yo‘q”, — deyiladi TIV xabarida.