AQSHda o‘limga hukm qilingan mahbus birinchi marta azot gazi bilan qatl qilindi. Bunday o‘lim jazosi Alabama shtatida 1988-yilda Elizabet Sennetni o‘ldirishda ayblangan Kennet Yujin Smitga nisbatan qo‘llandi.
Elizabet Sennet 1988-yil 18-mart kuni o‘lik holda topilgan. Jabrlanuvchining eri Charlz Sennet politsiyaga murojaat qilgan. Ayol o‘lgunicha kaltaklangan, uydagi qimmatbaho buyumlar yo‘qolgan, bu o‘g‘irlik paytidagi qotillikka o‘xshardi. Tergov jarayonida Elizabet Sennetning qotilligiga uning eri buyurtma bergani ma’lum bo‘ldi. Charlz Sennetning katta qarzi bo‘lgan, u buni xotinining sug‘urtasidan to‘lov olish orqali hal qilishga umid qilgan. Qotillikning bevosita aybdorlari Kennet Smit va Jon Parker bo‘lib, har biriga 1000 dollardan to‘langan. Charlz Sennet qotillikdan bir hafta o‘tib, asosiy gumondor ekani ayon bo‘lgach, o‘z joniga qasd qildi. Jon Parker 2010-yilda qatl etildi.
Qatl davomida Smitga maxsus niqob kiydirildi, unga 15 daqiqa davomida azot berildi. Guvohlarga ko‘ra, dastlabki ikki daqiqada Smit hushida bo‘lgan.
Hukm ijro etilishidan oldin, Smit qatlni kuzatayotganlarga murojaat qilib, shunday degan:
“Bugun Alabama insoniyatni ortga qadam tashlashga majburladi... Men sevgi, tinchlik va yorug‘likka ketyapman”.
Qotillik qurboni bo‘lgan ayolning o‘g‘illaridan biri hukmning ijrosini sharhlar ekan “Kennet Smit 35 yil oldin noto‘g‘ri qaror qabul qilgani, bugun uning badalini to‘laganini” aytdi.
Smitni o‘ldirish hukmi ikkinchi urinishda amalga oshirildi. 2022-yilda uni o‘limga olib keladigan inyeksiya yo‘li bilan qatl qilishmoqchi bo‘lgan, ammo jallodlar shprits ignasini tomirga kirita olishmagan. Smitning advokati uni yana qatl qilishga urinish asossiz shafqatsizlik bo‘lishini ta‘kidlashga uringan. Sud ijroni bekor qilishdan bosh tortgan.
Alabamada qo‘llangan yangi qatl usuli avvalroq huquq himoyachilari va shifokorlar tomonidan ommaviy ravishda qoralangan edi. Xususan, BMTning Inson huquqlari bo‘yicha Oliy komissari azot gazi bilan qatl qilish xalqaro huquqqa muvofiq qiynoq va shafqatsiz muomalaga tenglashtirilishi mumkinligini aytgan, deb yozadi BBC rus xizmati. Shu bilan birga, Alabama shtati rasmiylari azot gazini “eng insonparvarcha qatl usuli” deb atagan.
Izoh (0)