Rossiyada kamida 8 ming ukrainalik, shu jumladan tinch aholi asirlikda qolmoqda, dedi Ukraina tashqi ishlar vazirligining Harbiy asirlar bilan muomala qilish bo‘yicha muvofiqlashtiruvchi shtab vakili Yuriy Taranyuk Inson huquqlari, gender tengligi va xilma-xillik bo‘yicha kengash yig‘ilishida.
Taranyukning so‘zlariga ko‘ra, Rossiya agressiyasi davrida Moskva bilan 49 marta mahbuslar almashinuvi kelishilgan va amalga oshirilgan.
O‘n minglab odamlar bedarak yo‘qolgan
“Muvofiqlashtiruvchi shtabning maqsadi — Rossiya asirligidagi har bir shaxsni Ukrainaga qaytarish. Bu tinch aholiga ham, harbiy asirlarga ham taalluqlidir. Hozirda 49 ta almashinuv o‘tkazildi va 2 828 kishi uyga qaytarildi, shundan 2 681 nafari — harbiylar, 147 nafari tinch aholi vakillari. Bizga ma’lum 8 000 dan ortiq odam u yerda asirlikda qolmoqda. Shulardan 1 600 dan ortig‘i tinch aholi”, — dedi Yuriy Taranyuk.
Uning qo‘shimcha qilishicha, Muvofiqlashtirish shtab janglarda bedarak yo‘qolgan o‘n minglab boshqa ukrainaliklarni qidirishda davom etmoqda. Shu bilan birga, Taranyuk bedarak yo‘qolganlarning aksariyati Rossiya asirligida ekaniga ishonch bildirdi.
Ukraina va Rossiya o‘rtasida so‘nggi mahbus almashinuvi 2024-yilning boshida bo‘lib o‘tgan. 3-yanvar kuni 230 nafar ukrainalik vataniga qaytdi. Bungacha mahbuslar almashinuvi faqat 2023-yilning avgustida amalga oshirilgan.
Izoh (0)