Ispaniya qirollik futbol federatsiyasi (RFEF) Ispaniya Superkubogidan keladigan daromadning bir qismidan ayrilishi mumkin.
IU Sport nashrining El Confidencial va El Mundo nashrlariga tayanib xabar berishicha, Ispaniya Superkubogini Saudiya Arabistonida 2029-yilgacha o‘tkazish bo‘yicha shartnomada “Real” va “Barselona” musobaqaga chiqa olmagan taqdirda jazo choralari nazarda tutilgan.
Har bir turnir uchun Ispaniya qirollik futbol federatsiyasi (RFEF) 40 million yevro oladi. Biroq, ikki gigantdan biri ishtirok etmasa, bu narx 5 million yevroga kamayadi.
“Barselona” klubi Ispaniya Kubogining chorak finalida “Atletik”ka mag‘lub bo‘lib (2:4), musobaqani tark etdi. Kubok musobaqasidan chiqib ketgan kataloniyalik La Ligada 1 yoki 2-o‘rinni olsagina keyingi mavsumda bo‘lib o‘tadigan Ispaniya Superkubogida ishtirok etish huquqini qo‘lga kiritadi.
Hozirda Xavi jamoasi Ispaniya chempionatida 3-o‘rinda bormoqda. Turnir jadvali quyidagicha ko‘rinish olgan:
2019/20-yilgi mavsumdan boshlab, turnir “to‘rtlik finali” ko‘rinishida davom etmoqda. Unda Primeraning chempioni va vitse-chempioni, shuningdek, Ispaniya Kubogining ikkala finalchisi ishtirok etadi. Agar jamoalardan biri mavsum yakuniga ko‘ra zarur bo‘lgan o‘rinlardan ko‘prog‘ini egallagan bo‘lsa, chempionatda 3-o‘rinni egallagan jamoa taklif qilinadi.
Eslatib o‘tamiz, joriy mavsumdagi Ispaniya Superkubogi finalida (14-yanvar) “Real” “Barselona” ustidan 4:1 hisobida g‘alaba qozongandi.
Izoh (0)