AQSH va Iroq yaqin orada amerikalik harbiylarining mamlakatdagi kelajagi bo‘yicha muzokaralarni boshlaydi. Bu haqda manbalarga tayanib, CNN xabar berdi.
“Qo‘shma Shtatlar Iroqdagi sharoitlarga, jumladan, ISHIDning mag‘lubiyatiga, hukumat va Iroq xavfsizlik kuchlarining barqarorligiga asoslangan grafikni afzal ko‘radi”, — deydi AQSH rasmiylari.
Shu bilan birga, Iroq hukumatining ba’zi rasmiylari mamlakat ichidagi barqarorlik yoki xavfsizlik holatidan qat’i nazar, AQSH qo‘shinlarini olib chiqish sanasini belgilovchi grafikni xohlaydi. Mintaqaviy beqarorlik kengaygan sharoitda AQSH harbiylarining mavjudligi masalasi dolzarb bo‘lib qoldi. Iroqda AQSH qo‘shinlarini mamlakatdan olib chiqish to‘g‘risidagi ommaviy chaqiriqlar ham kuchaymoqda.
Isroil va HAMAS o‘rtasidagi urush 2023-yil oktyabr oyida boshlanganidan beri AQSH qo‘shinlari Iroqda kamida 58 marta, Suriyada esa 83 marta raketa va dronlar hujumiga uchradi.
Iroqda 2500 ga yaqin amerikalik askar bor, ular 2021-yil dekabr oyida AQSH harbiylari mamlakatdagi harbiy missiyasini yakunlaganini eʼlon qilganidan beri u yerda maslahatchi bo‘lib xizmat qilmoqda va yordam ko‘rsatmoqda.
Izoh (0)