Shimoliy Koreyada ikki o‘smir Janubiy Koreya filmlarini tomosha qilgani uchun omma oldida 12 yillik og‘ir mehnatga hukm qilindi. Bu haqda BBC xabar bermoqda va bolalarning sud jarayoni aks etgan kadrlarni e’lon qildi.
2022-yilda olingani taxmin qilinayotgan kadrlarda ochiq stadionda yuzlab o‘quvchilar ko‘z o‘ngida qo‘llari kishanlangan ikki yigit tasvirlangan. Forma kiygan ofitserlar ularni “o‘z xatolarini tushunmagani” uchun qoralaydi.
Nashrning qayd etishicha, KXDRda Janubiy Koreyaning ko‘ngilochar dasturlari, jumladan, televideniyesi ham taqiqlangan.
Bunday kadrlar kam uchraydi, chunki Shimoliy Koreya mamlakatdagi hayotni aks ettiruvchi fotosuratlar, videolar va boshqa dalillarni sizdirishni taqiqlaydi. Ushbu video BBC’ga Shimoliy Koreyadan qochganlar bilan ishlaydigan Janubiy va Shimoliy taraqqiyot tadqiqot instituti tomonidan taqdim etilgan.
Maʼlumotlarga ko‘ra, rolik Shimoliy Koreyada mafkuraviy tarbiya va fuqarolarni Janubiy Koreyadan ko‘ngilochar dasturlarni tomosha qilmaslikdan ogohlantirish maqsadida tarqatilgan.
Videoda diktor hukumat tashviqotini takrorlayotgani aks etgan.
“Chirigan qo‘g‘irchoq rejim madaniyati hatto o‘smirlarga ham tarqaldi. Ular endigina 16 yoshda, ammo kelajagini barbod qildi”, — deydi videodagi ovoz.
Nashrning yozishicha, avvallari shunday yo‘l bilan qonun buzgan voyaga yetmaganlar panjara ortida emas, balki yoshlar mehnat lagerlariga jo‘natilgan va jazo odatda besh yildan kam bo‘lgan. Biroq 2020-yilda Pxenyan Janubiy Koreyaning ko‘ngilochar filmlarini qayta ko‘rib chiqish yoki tarqatish o‘lim bilan jazolanishi mumkin bo‘lgan qonunni qabul qildi.
Izoh (0)