Aholining epidemiologik barqarorligini taʼminlash maqsadida Yevropa va qo‘shni davlatlarda qayd etilayotgan yuqumli kasalliklarning O‘zbekiston hududiga kirib kelishi va tarqalish xavfini oldini olish bo‘yicha profilaktik tadbirlar yanada takomillashtirildi. Bu haqda Sanitariya-epidemiologik osoyishtalik va jamoat salomatligi qo‘mitasi xabar berdi.
Qayd etilishicha, 2023-yilda bolalarni yuqumli kasalliklarga qarshi emlash uchun 205 milliard so‘m mablag‘ ajratilgan. Bu mablag‘lar 2017-yilda ajratilgan mablag‘larga nisbatan 10 baravarga ortgan va bolalarni 13 xil kasalliklarga qarshi emlash qamrovi 95 foizdan yuqori ko‘rsatkichga chiqqan.
Shuningdek, ta’kidlanishicha, O‘zbekistonning Jahon savdo tashkilotiga qo‘shilishi maqsadida oziq-ovqat xavfsizligi bo‘yicha meʼyoriy hujjatlar ishlab chiqilmoqda.
Eksportni qo‘llab-quvvatlash maqsadida yil davomida oziq-ovqat va qishloq xo‘jaligi mahsulotlari eksporti bilan shug‘ullanadigan 1788 ta eksportyor korxonalar ro‘yxati shakllantirilgan. Ularga 1452 nafar qo‘mita xodimlari biriktirilib, eksportyor korxonalarda monitoring o‘tkazildi, ularning muammolari o‘rganilgan hamda eksport qilish uchun ko‘maklashish ishlari amalga oshirilgan.
Eslatib o‘tamiz, 2023-yilning noyabr oyida UNICEF va Vaksina alyansi Gavi O‘zbekiston Sog‘liqni saqlash vazirligiga 3,2 million dollardan ortiq qiymatga ega beg‘araz yordam ko‘rsatilishini eʼlon qilgandi.
Izoh (0)