Singapurning Wilmar International Limited kompaniyasi Toshkent viloyatida qishloq xo‘jaligi mahsulotlarini ishlab chiqaruvchi zavod qurishni rejalashtirilmoqda. Bu haqda “Dunyo” agentligi xabar berdi.
Qayd etilishicha, Toshkent viloyati hokimi Zoir Mirzayev korxona vakillari bilan onlayn muloqot olib borib, loyihani amalga oshirishga qaratilgan memorandumni imzolagan. Loyiha qiymati 100 million dollarni tashkil etib, bo‘lajak korxonada un, o‘simlik moylari, tarkibida oqsil miqdori yuqori yem mahsulotlari ishlab chiqarish rejalashtirilgan.
Zavod qurilishi loyihasining texnik-iqtisodiy asoslari 2024-yilning birinchi yarmida yakunlanadi. 2024−2025-yillarda loyihani amalga oshirish belgilangan.
Shuningdek, Wilmar mahsulotlarni Markaziy Osiyo, Yaqin Sharq va boshqa mamlakatlar bozoriga eksport qilish uchun distribyutorlik markazini yaratadi. Loyiha Surum qishlog‘ida, temir yo‘l va Toshkent halqa yo‘liga tutashgan 30 gektar maydonda amalga oshiriladi. Kelajakda korxona kengaytirilishi mumkin.
Avvalroq Xorijiy investitsiyalarni jalb etish agentligi rahbari Murod Mirzayevni lavozimidan ozod etishga ko‘rsatma berilgani, O‘zbekistonga chetdan karrasiga qimmat narxda kirayotgan uskunalar bo‘yicha nazorat tizimi yo‘lga qo‘yilishi to‘g‘risida xabar berilgandi.
Izoh (0)