Madaniyat sohasi raqamlashtiriladi, onlayn davlat xizmatlari soni ko‘payadi. Bu haqda Madaniyat vazirligida bo‘lib o‘tgan yig‘ilishda aytib o‘tildi.
Vazir Ozodbek Nazarbekov sohani raqamlashtirish orqali korrupsiyaviy omillarning oldini olish, tizimga doir maʼlumotlarni prognozlashtirish, olingan maʼlumotlar kelgusidagi rejalarni to‘g‘ri shakllantirish imkonini berishini alohida taʼkidladi.
“Agar bu tizim ishga tushsa, qayerda g‘ijjakchi ko‘payib ketyapti, qayerda dutorchilarni tayyorlash oqsayapti, barchasini besh qo‘lday bilishimiz va ushbu maʼlumotlar asosida davlat kvotalari miqdorini shakllantirishimiz mumkin bo‘ladi. Qolaversa, sohadagi vaziyatni oldindan ko‘ra bilish, shunga qarab kelgusidagi rejalarimizni prognozlashtirish imkoniyati paydo bo‘ladi”, — deya taʼkidladi Ozodbek Nazarbekov.
Qayd etilishicha, yangi tizim to‘liq ishga tushgandan so‘ng respublikadagi barcha musiqa va sanʼat maktablari, vazirlik tizimidagi oliy va o‘rta maxsus taʼlim muassasalaridagi o‘quvchi hamda talabalar, pedagoglarning tarkibi, ularning erishgan natijalari, qaysi hududda sanʼatning qaysi turi rivojlanayotgani-yu, qaysi turi oqsayotganiga doir barcha maʼlumotlardan foydalanish mumkin bo‘ladi.
“Bu tizim respublikamizdagi yosh isteʼdodlarni kuzatib borish, munosib rag‘batlantirish, tanish-bilishchilik va boshqa omillar tufayli ular yarim yo‘lda rivojlanmay qolib ketmasligi, kelgusida sanʼat va madaniyat yo‘nalishidagi o‘rta maxsus yoki oliy taʼlim muassasalariga faqat munosib nomzodlar qabul qilinishiga erishish uchun ham muhim.
Isteʼdodlarni turli qing‘irliklar qurboni bo‘lishlaridan asrab-avaylashimiz kerak. Bu jarayonda esa raqamlashtirishning o‘rni juda muhim. Kelgusida yangi tizim ishga tushgach, hududlarga borib mutasaddilarga eng isteʼdodli yoshlarni ko‘rsating, deyishimizga hojat qolmaydi, qo‘limizda bu maʼlumot bo‘ladi. Masʼullar ham ‘o‘zinikini’ bizga ‘eng yaxshilar’ sifatida taqdim eta olmaydi”, — deydi madaniyat vaziri.
Izoh (0)