Toshkentda reportaj olishga borgan “Novosti Uzbekistana” nashri xodimi ichki ishlar xodimlari tomonidan asossiz olib ketilib, bir necha soat idorada ushlab turilgani haqida xabar berilgan edi. Bosh prokuraturaning ma’lum qilishicha, jurnalistning buzilgan huquqi tiklangan.
“Novosti Uzbekistana” muxbiri Mixail Dovlatov 14-yanvar kuni Uchtepa tumani 11-dahada istiqomat qiluvchi aholi bilan uchrashishi, ular o‘z navbatida 150 ga yaqin garaj hamda 98 ta daraxt o‘rniga bolalar bog‘chasi qurilayotgani to‘g‘risida ma’lumot berishi kerak bo‘lgan. Dovlatov aholi bilan soat 13:00 da voqea joyida uchrashishga kelishgan. Shuningdek, u yerda Uchtepa tumani hokimligi vakillari, ekolog va boshqa ekspertlar taklif etilgan.
Uchrashuv joyiga borganida muxbir belgilanmagan joyda sigaret chekkani bahonasida ichki ishlar idorasiga olib ketilgan va u yerda jurnalistga nisbatan asossiz ravishda bayonnoma rasmiylashtirilgan. Axborot va ommaviy kommunikatsiyalar agentligi holat yuzasidan Bosh prokuraturaga so‘rov xati yuborgan edi.
Aniqlanishicha, sudning qaroriga muvofiq, “Novosti Uzbekistana” internet-nashri muxbiri Mixail Dovlatovning harakatida maʼmuriy huquqbuzarlik alomatlari yo‘qligi sababli, unga nisbatan yuritilgan maʼmuriy huquqbuzarlik to‘g‘risidagi ish tugatilib, jurnalistning buzilgan huquqi tiklangan.
Jurnalist bilan bog‘liq holatga aloqador shaxslarning harakatlariga huquqiy baho berish yuzasidan xizmat tekshiruvi tayinlangan.
“Shu o‘rinda, mamlakatimizda ommaviy axborot vositalari faoliyati va jurnalistlarning huquq va erkinliklari qonun bilan qo‘riqlanishi haqida yana bir bor eslatib o‘tamiz”, — deyiladi idora xabarida.
Izoh (0)