Oliy Majlisning Inson huquqlari bo‘yicha vakili (ombudsman)ning Qoraqalpog‘istondagi mintaqaviy vakili Qo‘ng‘irot tumanidagi 27-son manzil-koloniyasiga monitoring tashrifini amalga oshirganida, mahkumlar mehnat huquqlarining buzilayotgani bo‘yicha shikoyat qildi. Bu haqda ombudsman matbuot xizmati xabar berdi.
Qayd etilishicha, ombudsman mintaqaviy vakili mahkumlarning shartnoma asosida mehnatga jalb etilgan uchta MCHJlardagi mehnat va yashash sharoitlarini o‘rgangan. O‘rganishlar davomida ushbu korxonalardagi sharoitlar belgilangan talablarga javob bermasligi aniqlangan. Shuningdek, 100 nafardan ortiq mahkumning oylik maoshi to‘lab berilmagani maʼlum bo‘lgan.
Mazkur holat ombudsman nazoratiga olinib, aniqlangan salbiy holatlarni bartaraf etish yuzasidan IIV huzuridagi Jazoni ijro etish departamentiga taqdimnoma kiritilgan.
Mazkur taqdimnoma ko‘rib chiqilishi natijasida, mahkumlarga 2023-yil avgust—sentyabr oylari uchun ikkita MCHJdan jami 186 million so‘mdan ortiq ish haqi undirib berildi.
Shuningdek, mazkur MCHJlarning bittasida mahkumlarning yashash sharoitida aniqlangan kamchiliklar bartaraf etilgan. Qolganlari bilan tuzilgan shartnomalar 27-son manzil-koloniya tomonidan bekor qilingan.
“Mahkumlarning ish haqini undirish bo‘yicha ishlar davom ettirilmoqda. 2023-yilning dekabr oyida 27-son manzil-koloniya tomonidan 25 nafar mahkumning ish haqini undirish bo‘yicha sudga daʼvo ariza kiritilgan”, — deyiladi xabarda.
Avvalroq ombudsman Navoiydagi koloniyada Nukus voqealari bo‘yicha qamalgan Dauletmurat Tajimuratov bilan uchrashgani to‘g‘risida xabar berilgandi.
Izoh (0)