Ukraina ommaviy axborot vositalari ma’lumotiga ko‘ra, Azov dengiz ustida Rossiyaning A-50 josus samolyoti urib tushirilgan va Il-22M bombardimonchi samolyotiga jiddiy zarar yetkazilgan. Dastlab bu haqda ma’lumot 15-yanvar, dushanbaga o‘tar kechasi Ukraina Oliy radasi deputatlari Yuriy Misyagin va Aleksandr Fediyenkovning Telegram-kanallarida paydo bo‘ldi.
“A-50 urib tushirildi, Il-22 ga zarar yetkazildi, ikkinchisi havoda edi va eng yaqin aerodromga borishga urindi, lekin u Kerch hududida pasayishni boshlaganidan keyin radarlardan g‘oyib bo‘ldi”, dedi Oliy radaning mudofaa masalalari qo‘mitasi rahbari o‘rinbosari Yuriy Misyagin.
Keyinchalik, Ukraina Qurolli Kuchlari bosh qo‘mondoni Valeriy Zalujniy Azov dengizi osmonida Rossiyaning A-50 va Il-22 samolyotlari urib tushirilganini ma’lum qildi.
Rossiya mudofaa vazirligi samolyotga berilgan zarbalar haqidagi ma’lumotga rasman izoh taqdim etmadi. Rossiya mudofaa vazirligiga yaqin bo‘lgan “Rybar” Telegram-kanali voqeaning versiyalaridan biri sifatida Rossiya havo mudofaa tizimidan “do‘stona nishonga olish”ni keltirdi.
A-50 — uzoq masofali radiolokatsion aniqlash va boshqarish sovet samolyoti. U radarni olib yuradi hamda zarbalarni tayyorlash va dushman hujumlarining oldini olish uchun oldingi razvedkada ishlatiladi. Rasmiy ma’lumotlarga ko‘ra, Rossiyada bunday samolyotlar soni 10 dan kam. Bitta A-50 ning narxi 330 million dollarga baholanadi.
Izoh (0)