Toshkentda korxona ishchisi rezervuarga to‘kilayotgan sement ostida qolib ketdi

Yangihayot tumani hokimligi ijtimoiy tarmoqlarda tumandagi zavodlarning birida baxtsiz hodisa yuz bergani aks etgan video yuzasidan ma’lumot berdi.

Qayd etilishicha, hodisa “Binokor temir-beton servis” korxonasida 13-yanvar kuni soat 15:30 da sodir bo‘lgan. 

Bunga sabab — sement to‘ldirilgan avtomashina 80 tonnalik sement saqlash rezervuariga sement to‘kayotgan vaqtida rezervuarda sement to‘lganini avtomat tarzda xabar berish mayoqchasi texnik nosozlik tufayli xabar qilmagan va shu bois, sement pastga chang bo‘lib tushgan. 

Hodisa oqibatida, korxona ishchilaridan biri sement changi ostida qolib ketgan.

“Ishchining hozirgi holati yaxshi va unga hech qanday tan jarohati yetmagan”, — deyiladi xabarda.

Eslatib o‘tamiz, 2023-yilning may oyida Janubiy Koreyadagi zavodda ishlagan O‘zbekiston fuqarosi xizmat vazifasini bajarayotib, harorati 67 daraja bo‘lgan issiq suv bakiga tushib ketishi oqibatida olgan jarohatlari tufayli vafot etgandi.