Sankt-Peterburg janubidagi Pushkinskiy tumanida tayyor mahsulotlar ombori yonib ketdi. Bu haqda Rossiya Favqulodda vaziyatlar vazirligi xabar bermoqda.
FVV hududiy boshqarmasi ma’lumotlariga ko‘ra, yong‘in Moskva shossesi, 153-uyda boshlangan. U yerda Wildberries kompaniyasiga tegishli omborxona mavjud.
Favqulodda vaziyatlar vazirligining birinchi xabarida yong‘in maydoni 1 000 kvadrat metr ekani aytilgan, biroq yarim soatdan so‘ng qutqaruvchilar yong‘in maydoni 50 ming kvadrat metrga ko‘payganini ma’lum qildi.
Keyinroq Favqulodda vaziyatlar vazirligi ombordagi yong‘in 70 ming kvadrat metr maydonni qamrab olgani haqida xabar berdi.
Wildberries marketpleysi Telegram kanalida aytilishicha, yonayotgan ombordagi odamlar evakuatsiya qilingan.
“Mijozlarga yo‘qotilgan buyurtmalar uchun pul qaytariladi. Sotuvchilar shikastlangan yoki yo‘qotilgan mahsulotlar uchun tovon oladi”, — deyiladi kompaniya xabarida.
Favqulodda vaziyatlar vazirligiga yaqin “RBK” manbasining xabar berishicha, yong‘inning dastlabki versiyalaridan biri sifatida qasddan o‘t qo‘yish ko‘rilmoqda. Nashrning eslatishicha, 10-yanvar kuni kechqurun ombor binosi yonida migrantlar o‘rtasida ommaviy mushtlashuv bo‘lib o‘tgan. Oqibatda Ozarbayjonning 33 yoshli fuqarosi, Wildberries xodimi pichoqlanib, kasalxonaga yotqizilgan. Shuningdek, Tojikistonning 35 yoshli ishsiz fuqarosi ham jarohat olgan. Shundan so‘ng xavfsizlik kuchlari ikki kun davomida omborda reyd o‘tkazdi.
Izoh (0)