AQSH Kongressi Vakillar palatasining Tashqi aloqalar qo‘mitasi rahbari Maykl Makkol Ahmad Mas’udga “Tolibon” hukumatini ag‘darishda yordam bermoqchi, deb yozdi Aamaj News.
Makkol “Tolibon” hukumatini ag‘darish uchun Afg‘onistonning “shimoliy yetakchilari”, jumladan, qarshilik fronti yetakchisi Ahmad Mas’ud bilan gaplashmoqchi ekanini aytgan.
“Tolibon”ning xatti-harakatlarini o‘zgartirishga urinib ko‘rishimiz mumkin, ammo biz ularga pora berishni xohlamaymiz, men Afg‘oniston shimolidagi faol va tirik yetakchilar bilan gaplashmoqchiman, — deb qo‘shimcha qildi u.
Makkolning ta’kidlashicha, Qo‘shma Shtatlar Afg‘oniston G‘arb dunyosi uchun xavf tug‘dirmasligini taʼminlashni istaydi va bu maqsadga erishish uchun barcha imkoniyatlar ishga solinadi.
“Tolibon” rejimi imkon qadar tezroq yo‘q bo‘lib ketishini xohlayman. Ular yaxshi odamlar emas, Afg‘oniston xalqi yaxshi va mehribon xalq, ularning ko‘pchiligi “Tolibon”ning shafqatsiz hukmronligi ostida yashashga majbur bo‘layotgani achinarli, — dedi amerikalik rasmiy.
Boshqa tarafdan AQSH Kongressi Vakillar palatasining Tashqi aloqalar qo‘mitasi rahbari Afg‘onistonda ayollar huquqlarini ta’minlashga chaqirdi.
Afg‘onistonda “Tolibon” hokimiyatga kelganidan so‘ng, toliblar hukumatiga qarshi ikkita harbiy front — Ozodlik fronti va Milliy qarshilik fronti ish olib bormoqda, oxirgi paytlarda ularning hujumi kuchaygan.
Shu bilan birga, Afg‘oniston Milliy qarshilik fronti AQSH Kongressi Vakillar palatasi Tashqi aloqalar qo‘mitasi raisining “Tolibon”ga qarshi bo‘lgan demokratik kuchlar bilan muloqotga doir bayonotlarini olqishladi.
“Biz Afg‘onistonning xalqaro hamjamiyatdagi do‘stlari, xususan, AQSH bilan aloqalarimizni mustahkamlashdan manfaatdormiz”, — dedi Qarshilik frontining tashqi aloqalar bo‘yicha xodimi Maysam Nazariy.
Izoh (0)