Toshkentdagi Paynet’larda plastik kartaga pul tushirib, naqd pulni bermasdan qochib ketgan shaxsning videosi tarqalgani to‘g‘risida xabar berilgandi. Toshkent shahar IIBBga ko‘ra, ayni vaqtda gumonlanuvchi qo‘lga olingan.
![](/static/2023/Fozilbek/paynet-XApDgm_qsd.jpg)
Qayd etilishicha, hozirda ushbu shaxsga nisbatan poytaxt IIBB Axborot sohalaridagi jinoyatchilikka qarshi kurashish boshqarmasi tomonidan tergov harakatlari olib borilmoqda.
Shimoliy Olmazorga bordim, 680 ming tashlavoring (Paynet orqali — “Daryo” izohi) dedim, tashlavordi. Hozir olib kelib beraman deb, taksiga o‘tirib ketvordim. Keyin “Ganga”ning qarama-qarshi tarafidagi Paynet’da 507 ming hisobimga tushirib, yana chiqib ketdim. To‘g‘risini aytaman, maqsadim aldab chiqib ketish edi. Qilgan ishimdan afsusdaman, uzr so‘rayman, — deydi gumonlanuvchi.
Ma’lum bo‘lishicha, ushbu shaxs bundan oldin ham sodir etgan jinoyatlari uchun Jinoyat kodeksining 169- (o‘g‘rilik), 277 (bezorilik) va 166-moddalari bilan jazoni o‘tab chiqqan bo‘lgan.
Holat yuzasidan Jinoyat kodeksining 166-moddasi (talonchilik) bilan jinoyat ishi qo‘zg‘atilgan bo‘lib, unga nisbatan qamoqqa olish tarzidagi ehtiyot chorasi qo‘llanilgan.
Eslatib o‘tamiz, 2023-yilning aprelida Farg‘ona viloyati O‘zbekiston tumanida o‘zini “leytenant” deb tanishtirgan soxta xodim ushlangandi. Ushbu shaxsdan ichki ishlar organi xodimi kiyimi va qo‘l telefoni daliliy ashyo sifatida olingan edi.