“Kapital sug‘urta” AJning moliyaviy hisobotlarini o‘rganish natijalariga ko‘ra, qonunchilik hujjatlarida belgilangan meʼyorlarga rioya qilinmaganlik faktlari aniqlanib, 162 million so‘m miqdorida jarima solindi. Bu haqda Istiqbolli loyihalar milliy agentligi xabar berdi.
Bundan tashqari, “Sug‘urta faoliyati to‘g‘risida”gi qonuni 47-moddasi, “Litsenziyalash, ruxsat berish va xabardor qilish tartib-taomillari to‘g‘risida”gi qonunning 32-moddasi, Maxsus elektron tizim orqali ayrim faoliyat turlarini litsenziyalash tartibi to‘g‘risidagi Yagona nizomning 41-bandi hamda Istiqbolli loyihalar milliy agentligining tegishli qaroriga asosan “Kapital sug‘urta” AJga sug‘urta faoliyatini amalga oshirish bo‘yicha berilgan 2022-yil 22-noyabrdagi 049696-sonli litsenziya 11-yanvar sanasidan boshlab 10 kun muddatga to‘xtatilgan.
“Kapital sug‘urta” AJ litsenziyasining amal qilishini to‘xtatib turish muddati davrida yangi sug‘urta (qayta sug‘urta) shartnomalarini tuzish, amaldagi sug‘urta (qayta sug‘urta) shartnomalarini uzaytirish taqiqlanadi.
“Kapital sug‘urta” AJ ilgari tuzilgan sug‘urta (qayta sug‘urta) shartnomalari bo‘yicha o‘z zimmasiga olgan majburiyatlarni belgilangan tartibda bajarishi shart, — deyiladi xabarda.
Avvalroq Binance xalqaro kriptobirjasi O‘zbekistonda litsenziyasiz ishlagani uchun jarimaga tortilgani to‘g‘risida xabar berilgandi.
Izoh (0)