Yamanning shimoliy va markaziy qismini boshqaradigan “Ansor Alloh” (husiylar) harakati Qizil dengizda ilk bor AQSH kemasiga hujum qildi. Bu haqda “RIA Novosti” xabar berdi.
AQSH harbiy-dengiz kuchlari 31-dekabr kuni husiylarga hujum qilganidan keyin Yaman husiylari Qizil dengizda AQSH kemasiga birinchi hujumni amalga oshirgan.
“Qodir Yaratganining yordami bilan Yaman qurolli kuchlarining dengiz kuchlari, raketa kuchlari va dron aviatsiyasiyasi ko‘p sonli ballistik va kemaga qarshi raketa, dronlardan foydalangan holda qo‘shma harbiy operatsiya o‘tkazdi va sionistik tuzumning kemalarini qo‘llab-quvvatlaydigan Amerika kemasiga zarba berdi”, — deydi husiylar qurolli kuchlari vakili Yahyo Saria.
Uning so‘zlariga ko‘ra, mazkur operatsiya “31-dekabr, yakshanba kuni husiylarning harbiy-dengiz kuchlari Amerika kuchlari tomonidan uyushtirilgan hujumga birinchi javob bo‘ldi.
“Yaman qurolli kuchlari mamlakatimiz, xalqimiz va millatimizni qonuniy himoya qilish huquqi doirasida barcha dushman tahdidlariga javob berishdan tortinmaydi”, — deb taʼkidladi husiy qurolli kuchlari vakili.
Ta’kidlanishicha, Yaman qurolli kuchlari G‘azo sektoridagi blokada bekor qilinmaguncha, Arab va Qizil dengizlardagi bosib olingan Falastin portlariga yo‘l olgan Isroil yoki Isroil bilan bog‘liq kemalarning o‘tishiga to‘sqinlik qilishda davom etadi.
Izoh (0)