Qishloq xo‘jaligi vazirligi fermerlar subsidiya olish huquqidan vaqtincha mahrum qilingani haqida ijtimoiy tarmoqlarda tarqalgan xabarga munosabat bildirdi.
Tarqalgan xabarda fermer xo‘jaliklarining nasos agregatlari va sug‘orish quduqlari iste’mol qiladigan elektr energiyasi qiymatini qoplash uchun budjetdan subsidiyalar ajratish belgilangani, fermerlar subsidiya olish uchun “Agrosubsidiya” yagona axborot tizimiga ariza topshirishi belgilanganiga 5 oydan oshgani, biroq haligacha ariza topshirish imkoni yo‘qligi aytilgan.
Bunga javoban vazirlikning bildirishicha, Qishloq xo‘jaligi vazirligining “Agrosubsidiya” axborot tizimi orqali 45 turdagi subsidiyalar ajratib kelinmoqda. Vazirlar Mahkamasining 2023-yil 11-avgustdagi qarorida ham “Agrosubsidiya” axborot tizimi orqali subsidiya ajratilishi ham belgilab berilgan. Biroq mazkur subsidiyani ajratish mexanizmi va tartibini takomillashtirish bo‘yicha bir muncha ehtiyoj mavjud.
Prezidentning “Quyi bo‘g‘inda suv resurslarini boshqarish tizimini takomillashtirish hamda suv resurslaridan foydalanish samaradorligini oshirish chora-tadbirlari to‘g‘risida” 2024-yil 5-yanvardagi qaroriga muvofiq, 2023-yilda paxta va g‘allani sug‘orishga ketgan elektr xarajatlari uchun subsidiya olmagan fermer xo‘jaliklariga 2024-yil hisobidan 100 foizlik (bunga qadar 2 yilda 50 foiz ajratilgan) subsidiya mablag‘lari ajratilishi belgilangan.
Shu munosabat bilan, 2024-yilning 15-yanvaridan boshlab “Agrosubsidiya” axborot tizimida takomillashtirilgan mexanizm asosida fermer xo‘jaliklarining nasos agregatlari va sug‘orish quduqlari iste’mol qiladigan elektr energiyasi qiymatini qoplab berish tartibi joriy etilishi belgilangan.
Izoh (0)