Jahon sog‘liqni saqlash tashkiloti (JSST) COVID-19 infeksiyasini yuqtirmaslik uchun niqob taqish va ijtimoiy masofani saqlashga qaytishni maslahat bermoqda. 5-yanvar kuni JSST bosh direktori Tedros Adhanom Gebreyesus Twitter’da (X) joylagan postida ehtiyot bo‘lishga chaqirdi.
“COVID-19, gripp va boshqa patogenlar keltirib chiqaradigan nafas yo‘llari kasalliklari ko‘plab mamlakatlarda bir necha hafta davomida o‘sib bormoqda va so‘nggi bayramlardan keyin ham davom etishi kutilmoqda”, — deyiladi postda.
JSST rahbari niqob, emlash va test kabi samarali himoya vositalarini eslatdi.
“Testdan o‘ting va agar zarur bo‘lsa, yordam so‘rang, chunki COVID-19 ni davolash og‘ir kasallik va o‘limning oldini olishi mumkin. Ta’sirni kamaytirish uchun niqoblardan foydalanish, xonalarni shamollatish va masofa saqlashni davom ettiring, o‘zingiz va yaqinlaringiz COVID-19 hamda grippga qarshi emlaning”, — deb tavsiya qildi Gebreyesus.
Avval JSST 20-noyabrdan 17-dekabrgacha dunyo bo‘ylab 850 mingdan ortiq koronavirusga chalinish holatini qayd etgandi. Bu avvalgi 28 kunlik davrga nisbatan 52 foizga ko‘pdir. Kasallanishning yangi holatlari Rossiyada kuzatilgan.
Izoh (0)