Marsda milliard yillar avval suv bilan qoplangan Jezero krateri yuzasi hozir qanday ko‘rinishdaligi namoyish qilindi. Bu haqda Space xabar berdi.
NASA olimlari krater yuzasini suratga olgan Perseverance marsoxodining bir necha yuz tasvirlari asosida video yaratdi. Natijada rang-barang landshaftga ega bo‘lgan kraterning hozirgi cho‘lga aylangan yuzasining 360 daraja ko‘rinishi paydo bo‘ldi.
2023-yilning noyabr oyida, uch kun ichida Perseverance marsoxodi o‘zining Mastcam-Z kamerasi yordamida Jezero krateri yuzasini 993 ta suratga olgan, bu NASAga videoni yasash uchun hissa qo‘shgan. Quyidagi rasmga qarasangiz, ushbu rasm va videoda ko‘rsatilgan rang o‘rtasida katta farq borligini ko‘rasiz.
Tasvirda Mars yuzasining tabiiy ranglari ko‘rsatilgan, videoda esa rang Yernikiga o‘xshash yorug‘likka moslashtirilgan. NASA olimlarining fikricha, bu rangni sozlash astronomlarga kundalik tajribadan foydalanib Mars landshaftini o‘rganishda yordam beradi.
Bu landshaft ulkan Jezero krateri bo‘lib, u yerda taxminan 3,5 milliard yil davomida daryo suvi oqib o‘tadigan ko‘l bo‘lgan. Perseverance marsoxodi krater geologiyasini o‘rganishdan tashqari, yerdan tashqari mikroblarning hayot belgilarini ham qidirmoqda.
Marsoxod hozirda Airey tepaligi deb nomlangan hududda joylashgan. Bu yerdagi landshaft Mars yuzasida suv mavjudligini ko‘rsatadi. Olimlar fikricha, mayda, tekis, och rangli toshlar sekin harakatlanuvchi daryo qirg‘og‘ida to'plangan. Kattaroq toshlar esa kuchli toshqin natijasida u yerda bo‘lgan.
Olimlar, shuningdek, marsoxod joylashgan joyda qadimgi lava oqimining qoldiqlarini ham topgan. 2030-yillarning boshlarida Yerga yetib keladigan Marsdan olingan namunalarni o‘rganish vulqon jinsining aynan qachon paydo bo‘lganini aniqlashga yordam beradi. Shu tariqa, Jezero kraterida suv qachon va qancha vaqt davomida oqib o‘tganini aniqlash mumkin.
Darhaqiqat, Perseverance marsoxodi Jezero krateri tubida tadqiqot olib borganidan so‘ng, endilikda qadimgi daryo deltasini o‘rganishga kirishdi. Keyin olimlar marsoxodni daryo bo‘ylab, yuqoriga olib chiqadi. Ushbu joydan tosh namunalarini olish rejalashtirilgan. U o‘zida qadimgi Mars hayotining belgilarini saqlab qolgan bo‘lishi mumkin.
Izoh (0)