Meta Platforms bosh direktori Mark Sukerberg 2023-yilning to‘rtinchi choragida kompaniya aksiyalarini taxminan 428 million dollarga sotdi.
Bu haqda Bloomberg agentligi xabar berdi.
Qayd etilishicha, bu uning ikki yildagi ilk aksiyalari savdosi bo‘lib, Sukerberg kompaniya aksiyalari narxi so‘nggi yetti yildagi eng past darajaga tushishi fonida bunday qarorga kelgan. Bozor regulyatori hisobotiga ko‘ra, Sukerberg 1-noyabrdan yil oxirigacha har bir savdo kunida aksiyalarni sotgan va deyarli 1,28 million dona aksiyani pullagan.
Meta rahbari o‘rtacha har bir savdodan 10,4 million dollar daromad oldi, eng katta daromadni 28-dekabrda qo‘lga kiritdi. Shu kuni u aksiyalar sotuvidan 17,1 million dollarga ega bo‘ldi.
“Bundan oldin Sukerberg 2021-yil noyabridan beri Meta aksiyalarini sotmagan edi. O‘tgan yili kompaniya aksiyalari narxi 2022-yil oxiridagi yetti yillik eng past ko‘rsatkichdan keyin 194 foizga ko‘tarildi”, — deyiladi hisobotda.
Bundan tashqari, Meta aksiyalari 2023-yilda Nvidia Corp’dan tashqari boshqa barcha yirik texnologiya gigantlaridan ustun keldi va hozirda 2021-yil sentyabr oyidagi rekord darajaga yaqinlashmoqda.
Umuman olganda, Sukerberg Meta kompaniyasining 13 foiziga egalik qiladi. Bloomberg Billionaires Index ma’lumotlariga ko‘ra, u taxminan 125 milliard dollarga ega bo‘lib, bu uni dunyodagi yettinchi eng boy odamga aylantiradi.
Izoh (0)