Qirg‘iziston prezidenti Sadir Japarov investorlarni aldashga chek qo‘yish, davlat idoralarini byurokratiyadan xalos bo‘lishga chaqirdi. Qirg‘iziston prezidenti tegishli murojaatni o‘zining Facebook sahifasida eʼlon qildi.
“Keyingi yillarda mamlakatimizga xorijiy davlatlardan ko‘plab investorlar kela boshladi. Albatta, bu bizni juda xursand qiladi. Chunki xorijiy sarmoyasiz davlat rivojlanishi qiyin. Afsuski, ayrim sarmoyadorlar xususiy tadbirkorlar tomonidan aldanib, endilikda ular ariza yozmoqda. Albatta, huquq-tartibot idoralari ularni ushlab, pulni investorga qaytaradi.
Lekin bu ularning zimmasiga ortiqcha yuk bo‘lib, yurtimizning obro‘-e’tiborini boshqalar oldida tushirib yuboradi. Qirg‘izlarda bir qoshiq zahar bir bochka asalni buzadi, degan maqol bor. Oramizda shunday insofsizlar bir qancha. Do‘stlar, firibgarlikni to‘xtating!” — dedi Sadir Japarov.
Shuningdek, u investorlarni imkon qadar Iqtisodiyot va savdo vazirligi, Investitsiyalarni qo‘llab-quvvatlash agentligi kabi davlat idoralari, viloyat, tuman, qishloq hokimliklari rahbarlari bilan hamkorlikda ishlashga chaqirdi. Japarov davlat idoralari rahbarlaridan investorlar bilan yaqindan ishlashni so‘radi.
“Byurokratiya bo‘lmasligi kerak! Hududingizga kelayotgan investorlar soni va hajmidan kelib chiqib, har biringizning mehnatingizni baholaymiz”, — dedi Qirg‘iziston rahbari.
Izoh (0)