Davlat xavfsizlik xizmati xodimlari tomonidan Sirdaryo, Farg‘ona viloyatlari va Toshkent shahrida qonunbuzilishi holatlariga chek qo‘yildi.
Ma’lum qilinishicha, DXXning Sirdaryo viloyati bo‘yicha boshqarmasi xodimlari tomonidan Iqtisodiy jinoyatlarga qarshi kurashish departamenti bilan hamkorlikda tezkor tadbir o‘tkazilgan. Tadbirda Mirzaobod tumanidagi qishloq xo‘jaligi mahsulotlari yetishtirishga ixtisoslashgan MCHJ yuristi logistika xizmatlari ko‘rsatish bilan shug‘ullanuvchi masʼuliyati cheklangan jamiyat rahbaridan 14 ming dollar va 12 million so‘m olgan vaqtida qo‘lga olingan.
Aniqlanishicha, u viloyat prokuraturasi tomonidan mazkur MCHJ rahbariga nisbatan Jinoyat kodeksining 167-moddasi bilan qo‘zg‘atilgan jinoyat ishi doirasida MCHJning bekor qilingan guvohnomasini tiklash va soliq idoralari tomonidan 1 milliard 950 million so‘m qo‘shilgan qiymat solig‘ini olishga qo‘yilgan taʼqiq masalasini ijobiy hal qilib berishni vaʼda qilgan.
DXX Toshkent shahar bo‘yicha boshqarmasi va departament xodimlari hamkorligida o‘tkazilgan tezkor tadbirda, Iqtisodiyot va moliya vazirligi huzuridagi Kadastr agentligi bosh mutaxassisi Mirzo Ulug‘bek tumanida yashovchi fuqaroga nisbatan ichki ishlar organlari tomonidan jinoyat ishi qo‘zg‘atmaslik masalasini yuqori lavozimda ishlovchi tanishlari orqali hal qilib berish evaziga 6 ming dollar olgan vaqtida ushlangan.
Toshkent shahar Mirzo Ulug‘bek tumani ichki ishlar organlari faoliyatini muvofiqlashtirish boshqarmasi katta inspektori fuqarodan noqonuniy tarzda 4 ming dollar olgan vaqtida Davlat xavfsizlik xizmati va prokuratura organlari tomonidan ushlangan.
Aniqlanishicha, u Jinoyat kodeksining 251-prim 1-moddasi (kuchli ta’sir qiluvchi yoki zaharli moddalarni qonunga xilof ravishda muomalaga kiritish) 3-qismi bilan 7 yil muddatga ozodlikdan mahrum qilingan mahkumni Navoiy shahridagi 11-sonli jazoni ijro etish muassasasidan Chirchiq shahrida joylashgan 14-sonli jazoni ijro etish muassasasiga ko‘chirilishida yordam berishini vaʼda qilgan.
DXX Farg‘ona viloyati bo‘yicha boshqarmasi xodimlari tomonidan departament bilan hamkorlikda o‘tkazilgan tezkor tadbirda esa Farg‘ona shahrida yashovchi 39 yoshli sobiq harbiy xizmatchi o‘zining mansabdor tanishlari yordamida mahalliy fuqaroni ichki ishlar organlari tizimiga ishga kiritib qo‘yish evaziga 4 ming dollar olgan vaqtida ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
Avvalroq Buxoro shahri “Abu Ali ibn Sino” MFY hokim yordamchisi kredit mablag‘larini o‘zlashtirganlikda ayblanib, jinoyat ishi qo‘zg‘atilgani, Yangiyo‘l tumani hokimi mahallalardagi 6 nafar yordamchisini jazolagani to‘g‘risida xabar berilgandi.
Izoh (0)