“Parazitlar” filmida bosh rollardan birini ijro etgan aktyor Li Son Gyun Seulda o‘lik holda topildi. Bu haqda Janubiy Koreyaning Renxap agentligiga tayanib, Meduza xabar bermoqda.
Agentlikning maʼlum qilishicha, 48 yoshli aktyorning jasadi Seul markazidagi parklarning birida mashina ichidan topilgan. Taxminlarga ko‘ra, Li Son Gyun o‘z joniga qasd qilgan. Aktyor yo‘qolishidan oldin uyida o‘z joniga qasd qilish haqida eslatmaga o‘xshash xat qoldirgan.
2023-yilning kuzida Janubiy Koreya politsiyasi tomonidan Li Son Gyunga nisbatan tergov ishi boshlangan edi. U giyohvand moddalarni isteʼmol qilganlikda gumonlangan. Aktyorning o‘zi esa giyohvand moddalar unga shantaj maqsadida berilgan bo‘lishi mumkinligini aytgan. So‘nggi oylarda u politsiya tomonidan bir necha bor so‘roq qilingan. Shuningdek, u ikki marta qonda narkotik moddalar bor-yo‘qligiga topshirgan testlari manfiy chiqqan.
Aktyor 2020-yilda to‘rtta yo‘nalish bo‘yicha “Oskar” mukofotini olgan “Parazitlar” filmida janob Pak rolini o‘ynagan. Shuningdek, 2021-yilda “Emmi” mukofotiga nomzod bo‘lgan “Doktor Brayan” serialida ham bosh rollardan birini ijro etgan.
Izoh (0)