Xonanda va aktyor Anvar Sobirov “O‘zimizning gap” ko‘rsatuviga bergan intervyusida hayotini va dunyoqarashini o‘zgartirib yuborgan voqea haqida so‘zlab berdi.
— Hayotga juda chuqur yondashishimga kelinoyimning o‘limi sabab bo‘lgan. Qarangki, kelinoyimning o‘zlari oliy ma’lumotli tibbiyot xodimi, shifokor edi. Punktual, intizomli inson edi. Bedavo dard hech kimga rahm-shafqat qilmas ekan. Kasallik ularni 30 yoshlarida bu hayotdan olib ketdi. Bu voqeaga ham salkam 20 yil bo‘ldi. O‘shanda kasalxona koridoriga kirib, kasallarning so‘zlarini eshitganman. 20,30, 50, 80 ga kirgan kasallarni ko‘rdim. Ularning hammasining niyatlari, tilaklari bir xil: 80 ga kirgan inson ham “Bo‘ldi, yoshimni yashab bo‘ldim”, demayapti. “Ey Xudoyim, shifo bergin”, deb hayotga, yashashga talpinyapti. O‘sha kundan boshlab mening hayotimda juda katta o‘zgarish bo‘ldi. Hayotning qadriga yetish kerakligini angladim.
Shuningdek, Anvar Sobirov hozirgi paytda reytinglarda yuqori o‘rinlarni egallab kelayotgan qo‘shiqlar matnidan ko‘ngli to‘lmasligi haqida ham gapirib o‘tdi.
— Internetda oxirgi paytlarda ko‘p faol bo‘lmay qoldim. Ochasan, asabbuzarlik. Hozir o‘zini tutib olgan, necha yillik san’atkorlar ham bachkanalik qilayotganini ko‘rib hafsalang pir bo‘ladi. Yonimda yurgan shogirdlarim Instagram’dagi postlaringiz aktivligi past, siz ham har xil videolar qilib jonlantiring, deyishadi. Ularga “Qo‘y, meni chalg‘itma, ozmi-ko‘pmi xalqni mehriga sazovor bo‘gan bo‘lsam, shu bilan qolaveray, yetadi”, deyman. Hozir reyting degan narsa bor. O‘sha reytingning cho‘qqisida turgan qo‘shiqlarning so‘zlarini qog‘ozga tushiring-da, birovni ustidan yozilgan arizaga o‘xshaydi. Ularni she’r emas, shunchaki matn deb atayman. Shunaqa qo‘shiqlarning ketmoni uchyapti, urf bo‘lyapti.
Izoh (0)